E sefulu itumalo ua taofia nei mai le poloketi o le miliona tala e tufaina i tausaga taitasi mo atinae, ona ua tuuaia le lē tausisi i faiga faavae ma taiala o le polokalame.
O se saunoaga lea a le Taitaifono o le Faatuatua i Le Atua Samoa ua Tasi, o ia foi o se sui o le Poloketi Miliona, le afioga ia Laaulialemalietoa Leuatea Polataivao Fosi.
Sa mua’i faasalalau e le Minisita o Faatoaga lea tulaga i le polokalame a le EFKS TV Soalepule, ma ia toe faamaonia mai ai i le Samoa Global News ina ua maua se fesootaiga ma lana afioga.
“O lea ua tuuina atu se tusi mai le Minisita le afioga Leota Laki Lamositele e patino iai le poloketi, e faailoa i Itumalo e 10 ua lē usitaia faiga faavae o le miliona, e faamuta lo latou avanoa i le poloketi.”
O le tuuaiga ua faasaga i nei Itumalo e 10, e faapea ua lē o tutusa le faaogaina o le seleni ma taiala o le poloketi.
Saunoa Laaulilemalietoa, “O le $200,000 na faamatuu atu i Itumalo e aofia ai ma itumalo ia e 10, o mo le tapenaina lea o le fale poo se ofisa autu o le Fono Faavae a le Itumalo.. faapea le faatulagaina o tagata faigaluega o ofisa, a ma’ea, e ao ona tuuina mai i totonu faamaumauga o le faa’aogaina o lea seleni.”
O le mau a Laauli, o se asiasiga a le Komiti o le Miliona na maitauina ai nisi o Itumalo e le’i faia ni fale poo ni ofisa mautu e tusa ma faiga faavae o le Poloketi Miliona Tala i le Tausaga.
Saunoa Laaulialemalietoa, “Ua tufa le seleni sa tuuina atu, ma o lea faiga ua solia ai faiga faavae o le poloketi, ma o le mafuaaga tonu lea ua tusi atu ai le Minisita i ia itumalo e faailoa iai ua faataatia ese ia itumalo mai le poloketi o le miliona.”
“E 40 itumalo ua faapena ona usitaia ma mulimuli i faiga faavae sa tuuina atu, ma o le tausaga lenei o le a faamatuu atu ai le vaega lona lua o le poloketi, ae o itumalo ua lē usitai, ua faamuta ai lo latou avanoa.”
Sa faapea mai foi Laauli, e ono faia se faaiuga ia toe totogi mai le tupe o loo tuuaia ai itumalo ua latou faa’aoga sese.
O se faataitaiga o le lē fiafia o le Komiti o le Miliona, e faasaga lea i nisi o Itumalo e le’i fausiaina ni maota tumau mo fonotaga ma ofisa o a latou Komiti, ae o loo nofo totogi (rent).
O nisi o Itumalo e pei o le Itumalo a le Taitai o le HRPP, e le o fausiaina se maota tumau, ae o loo faasolo a latou fonotaga i nuu o le Itumalo.
E pei ona saunoa iai le Taitai o le Itu Agai afioga Tuilaepa Sailele Malielegaoi i se taimi ua Sola, o se latou lea auala e faamanuia ai nuu uma, pe afai e nofo totogi (rent expense) ae lē o finagalo le latou Komiti e fauina se maota tumau auā e alu ai foi isi tupe mo le faaleleia (repairs and maintenance).
O loo tuuaia foi e le taitai o le HRPP le fauina ma le faaleileia o Maota o Faipule e fai ma Ofisa tumau o Komiti o Itumalo.
Sa saili atu e le Samoa Global News pe mafai ona faasalalau faalauaitele se pepa o loo iai aiaiga uma o le faaogaina o le Miliona e Itumalo.
Sa taumafai atu se avanoa i le Tamaitai Ofisa Sili faapea le Minisita o le Matagaluega o Tina ma Tamaitai Nuu ma Agafesootai aemaise le vaega tonu o le Matagaluega o loo vaaia le poloketi, le tamaitai ia Ai’tu Ah Sam, peitai e le’i manuia.
