Ua tu’uina mai se faasalalauga faalauaitele e faalauiloa ai se fa’ai’uga aloā’ia a le Mālō, ua ‘ave’ese ai lana lagolago i le Lakapi Samoa ma ua lē toe aloā’ia ai e le Mālō le Lakapi Samoa na te fa’atautaia le ta’aloga o le lakapi i totonu o Samoa ma le va i fafo.
I se faamatalaga faalauaitele a le Malo (press release) o loo faailoa ai le tāofia ai o fesoasoani tau tupe.
“Ma ua tāofia ai fo’i ona toe tu’uina atu fesoasoani masani tau tupe a le Mālō ma isi uma fesoasoani i le Lakapi Samoa.”
O se fa’ai’uga e afua mai i le finagalo o le Mālō, ia fesoaosani i le toe lalagaina o le ta’aloga o le Lakapi, e pele i tagata Samoa.
“I le tuana’i o se taimi umi o finauga ma fe’ese’eseā’iga i totonu o le Iuni aemaise ai o le tulaga mauālalo ua pa’ū atu i ai le tulaga o le lakapi a Samoa i le lalolagi ona o le fa’afoega o le lakapi ua tele tausaga o a’afia ai..”
“Ua umi se taimi o fa’atali ina ia fofō alamea fa’afitauli o lo’o tula’i mai ma na taumafai fo’i le Mālō, e aumai fa’atasi itu o lo’o fe’ese’esea’i i se fonotaga na tau sā’ilia ai se fofō..”
“Ae peita’i, ua siliga tali i seu, ma ua leai lava se tasi.”
O lea ua fa’aālia ai e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, o lenei fa’ai’uga a le Mālō, ua ‘ave’ese ai le toe aloā’ia e le Mālō o le Lakapi Samoa.
“Fa’aālia e le Palemia, o lo’o mata’itū e le Mālō se Iuni Lakapi e ono ‘ave iai le lagolago a le Mālō i le lumana’i..
“Ina ia ausia fa’anaunauta’iga o le atunu’u ma tagata Samoa ma e lagolago i le lakapi a Samoa i le lalolagi i fafo, ina ia toe fa’afo’i le tulaga mauāluga o le lakapi a Samoa i le tulaga e tatau ona i ai.”
“O lo’o tumau pea le naunau o le Mālō ia atina’e lelei le lakapi a Samoa i le lumana’i, ma o lo’o ua ‘ave lana lagolago i nisi o polokalame tetele ua fa’ata’oto mai nei mo le atina’e o le ta’aloga i totonu o Samoa, i le lumana’i.”
- Lalaga le Vā Unites more than 300 Urban Community Leaders Against Drugs and Violence - September 8, 2026
- Keith Smith Officially Accredited as Canada’s High Commissioner to Samoa - September 1, 2026
- Diesel and Kerosene Prices Rise in September - September 1, 2026
