Ua avea nei Lautimuia Uelese ma Minisita o Tupe, ae faasee atu Mulipola Anarosa Molioo e avea ma Minisita o le Matagaluega o Tina ma Tamaitai, Nuu ma Agafesootai.
I le maea ai o le lua tausaga o le nofoaiga a le afioga i le Palemia, Hon Fiame Naomi Mata’afa, lea ua faalauiloa mai ai ni fesuiaiga o tulaga tofi mo le Kapeneta o Samoa, faapea ni Minisita fou se toalua.
O le afioga ia Mulipola Anarosa Molioo, sa ia tauavea le Matagaluega o Tupe, ua faasee atu nei i le Matagaluega o Tina ma Tamaitai, ae ua sui tulaga iai le afioga ia Lautimuia Afoa Uelese Vaai.
O Lautimuia Uelese e fou lona tulai mai i le FAST, ina ua manumalo i le palota laititi a le itumalo o Vaimauga 3, lea sa faavanoaina ina ua maliu le afioga ia Tapunuu Niko Lee Hang.
E le gata i le Matagaluega o Tupe, ae faapena foi ona tuuina atu ia Lautimuia le Labour Mobility Unit, lea sa i lalo o le Matagaluega o Pisinisi, Alamanuia ma le Leipa. O le vaega lea e feagai ma galuega faavaitaimi.
O le afioga ia Leota Laki Lamositele Sio, lea sa ia tauavea le Matagaluega o Tina ma Tamaitai, Nuu ma Agafesootai, ua ia see atu nei i le Matagaluega o Pisinisi, Alamanuia ma le Leipa (MCIL).
O le MCIL sa i lalo o le vaavaiga a le afioga ia Leatinuu Faumuina Wayne Sooialo, peitai, ua vaeluaina nei le MCIL ma le MPE, o ni Matagaluega tetele sa tauaveina uma e le tofa ia Leatinuu Wayne Sooialo.
O le a tumau pea le MPE ia Leatinuu, o se Matagaluega e faamautuina le pulega lelei ma le mulimulitai i tulafono o Faalapotopotoga Tumaoti e 27 a le Malo.
O le afioga ia Laumatiamanu Ringo Purcell, ua ia tauavea nei se tasi o Matagaluega faaopoopo, mo Taaloga ma Alaga Oa (Sports & Recreation).
O le afioga ia Laumatiamanu sa tautua i le Matagaluega o Leoleo mo le 20 tausaga. Sa galuei foi i le Samaoa Shipping mo le 10 tausaga, faapea ma se taimi sa galue ai i le JICA.
O le Pulega o Tagata Tafafao Maimoa mai Fafo (STA) lea sa i le afioga ia Toeolesulusulu Cedric Schuster, o le a tuuina atu nei i le afioga i le Palemia.
O le a tumau pea le MNRE i le afioga ia Toeolesulusulu Cedric, ae ua faaopoopo iai ma vaega tau eleele o Samoa, pei o le WSTEC, faapea le faalapotopotoga o eleele (Samoa Land Corporation).
O suiga e pei ona saunoa iai le Palemia, ua ono tatau foi ona faatino i le maea ai o le lua tausaga, ae maise o lea e toe lua foi tausaga o loo totoe o lenei paiaega.
Sa saunoa foi Fiame, o le Faavae o le Malo o Samoa, e 15 Minisita o loo faatulaga mai ai mo lana Kapeneta. Lea la ua atoa iai i le faaopoopo mai o Lautimuia ma Laumatiamanu.
O le aso muamua o Oketopa o le a amata faamamalu ai nei suiga ae o le aso a taeao e amata tapena ai Matagaluega o loo aafia i suiga.
Faasalalauga
