Ave le Faamuamua a Faleata 2 i Pili Aoga a le Fanau

0
216

Ua momoli le agaga faafetai a le Itumalo o Faleata 2 ina ua faamatuu mai se vaega tupe e $22,834 mo pili aoga a le fanau.

I le saunoaga a se tamā matua mai le afioaga o Vailoa Faleata, le tofā ia Lealailepule Segi Laikum, sa ia faafetaia ai le Poloketi Miliona a le Malo mo lenei faamama avega.

Faleata 2 Komiti o le Fono Faavae.

“E faafetai foi i le matou Sui Faipule ma le Komiti o le Fono Faavae Faleata 2, i le ave o le faamuamua i pili aoga a le fanau.

Sa faailoa e le Sui Taitaifono a le Komiti le afioga iā Mua’ausa Fiona Talouli, o le vaiaso nei e faagata ai pili aoga a le fanau i le Iunivesete, ae ua lagona lava le agaga fiafia ona ua fesoasoani mai le Malo e ala i le Poloketi Miliona lea ua maua ai le faamama avega.

“E viia ai lava le Alii.”

E silia ma le 20 fanau aoga i le Iunivesite a le itumalo ua faamanuiaina i lenei fesoasoani, lea e faaalu ai le seleni e $22,834.

O le itumalo Faleata 2, na faamanuiaina i le masina talu ai i le miliona lona lua, lea ua faamatuu mai ai le $160k mo le ofisa (operations) peitai, ua faailoa e le Sui Taitaifono le fetuunaiga ua ave ai le faamuamua i pili aoga, ae o le seleni o le poloketi e mulimuli mai o le a toe faatumu ai le seleni ua faaaogaina mo le fanau.

E $1,000 tala ua faamatuu atu mo le tamaitiiti aoga e toatasi, ae o le isi vaega o totoe o le pili aoga o le a sailia lava matua.

O le itu tau faatoaga ma soifua manuia lautele o isi ia o vaega ua ave iai le faamuamua a le Komiti o le Fono Faavae a le Itumalo o Faleata 2.

Hotel Elisa. Call +685.21116 or Visit www.hotelelisa.ws or Email: hotelelisa@samoa.ws