Ave le Fa’aeaea a Solosolo i lana Tama Fanau sa Kapeteniina le Manu Samoa

"O Nuafesili Fritz o se alo e faasino i le tina ia Telefina mai Solosolo ma le tama ia Fritz mai le afioaga o Vailele"

0
1515

Aso 3 Aukuso 2023 Apia Samoa. Ua ave le fa’aeaea maualuga a le afioaga o Solosolo i lana tama fanau sa ia kapeteniina le Manu Samoa i le taaloga ma Fiti lea sa faia i le Apia Park i le Aso Toanai na mavae atu nei.

O le taeao nei na faatumulia ai le afioaga o Solosolo; o le pule mamalu a Alii ma Faipule, o uo ma pa’aga, aiga, faapea le au a le atunuu le Manu Samoa ma le Pulega, e molimauina le faafotu tupu i le kapeteni le susuga ia Fritz Lee.

O le suafa tulafale, o Nuafesili ua faapena ona fa’aee atu i le tama fanau a le afioaga.

O Nuafesili Fritz Lee, o se tasi sa avea ma se sui o le au taitoafitu a Niu Sila i le 2010, faapea foi le au faaitumalo a le Waikato Chiefs i le taamilosaga Super Lakapi.

Sa ia kapetenia le au lakapi a le Counties Manukau i le tausaga 2013 ma ia taitaia ai le au e manumalo i le Ranfurly Shield ia Hawkes Bay i Napier.

Sa ia tuua Niu Sila e faamautu ma faaauau le taleni i totonu o Farani i le tausaga 2013.

O Nuafesili Fritz o se alo e faasino i le tina ia Telefina mai Solosolo ma le tama ia Fritz mai le afioaga o Vailele.

Ua 34 ona tausaga, ae sa fanau o ia i Solosolo ma aoga i Samoa nei, se ia oo ina ua 15 ona tausaga, sa tuua ai Samoa ae malaga atu i Niu Sila ma faamautu ai.

Nuafesili Fritz Lee ma nisi o le au a le Manu Samoa.

O le faafotu tupu na molimauina ai le auai o le afioga ia Fonotoe Nuafesili Piea Lauofo, le Sui Taitai o le Itu Agai, faapea le afioga i le Minisita ia Leota Laki Lamositele Sio.

Sa tā’ua e Nuafesili Fritz lona lagona faagaeetia ma faafetaia ai le mamalu o le afioaga ae maise o ē o loo faasa’osa’o i lo latou aiga, mo le fa’aaloalo, ae maise o le avanoa e tautua ai i lona aiga, nuu ma le Ekalesia.


[starbox]