Ave e le FAST le Faaiuga a le Ofisa o Faigapalota i le Faamasinoga

0
9395

Ua fa’amautuina mai se fa’ai’uga a le Vaega Fa’aupufai a le Fa’atuatua i le Atua Samoa ua Tasi (FAST) o le a o latou lu’iina le fa’ai’uga sa fa’alauiloa mai e le Ofisa o Faigapalota i le po anapo, e fa’aopoopoina ai se sui tamaitai e toatasi, e fa’aatoa ai le 10 pasene o nofoa mo sui tama’ita’i i le Fono Usu a Samoa.

O lenei fa’ai’uga ua sainia aloaia e le Ao Mamalu o le Malo, Tuimalealiifano Va’aletoa Sualauvi II, i luga o se fautuaga a le Afioga i le Komesina o Faigapalota, Faimalomatumua Mathew Lemisio.

I se faatalanoaga ma tusitala i le afiafi nei, na saunoa ai le Saofaapito o le sa fai ma Sui Palemia o Samoa, ua faaoga sese le tulafono ma ua ia fesiligia foi le tutoatasi o le Komesina i lea fautuaga na tuuina atu i le Ao o le Malo.

O le fautuaga a le Komesina e pei ona faamauina i le faasalalauga aloaia a le Ao o le Malo, e fua i luga o vaega faapitoa o le Faavae o Samoa e ao ai ona umia e tamaitai le 10% o nofoa o le Palemene, ma o loo faamauina i lona Fuaiupu 44 (1A).

44(1) I le noatia ma le fai fuafua i lenei Mataupu, e tatau i Sui Usufono tamaitai o le Fono Aoao Faitulafono ona:
(a) aofia ai se fuainumera maualalo a itiiti mai e 10% o Sui
Usufono o le Fono Aoao Faitulafono ua faamaoti mai i lalo o le fuaiupu (1) lea e mo le aveesea ai o se tulaga masalomia, e toalima (5) o lo o i ai i le taimi nei;..

O le saunoaga a Fiame, o le faaopoopo o le sui o le Palemene, o le mea oso faalava, ma ua faaoga sese le tulafono.

“O le mea lava lenei e tausisi atu ai lava i le tulafono..”

Sa faapea mai le taitai o le FAST, o le Komesina o Faigapalota ua ia mautauina, a iai se mea e tulai mai e na te aapa lave i le Faamasinoga e maua mai ai se tali, ae o lea ua maitauina, ua le fesiligia le Faamasinoga ae ua fai a e ia le faaiuga e pei ona fautuaina ai le Ao o le Malo.

“Ua ou fesiligia le intent poo le agaaga ua fausia ai lea mea..”

O le finagalo o Fiame, ua le tusa le fa’ai’uga a le Komesina o Faigapalota ma aiaiaga o le Tulafono Fa’avae o Samoa lea e manino mai ai le numera 5.

“O loo manino lava le tulafono i le toalima, ina ia aua ai ona toe tau tuufesili..remove any doubt..”

Sa faapea mai foi se finagalo o Fiame, o le 6 lea ua aga’i iai se faaiuga a le Komesina, e seiloga lava e toa 60 le Palemene, ona faatoa tonu lea o le toaono o sui tamaitai (10 pasene).

Sa fesiligia foi e Fiame, pe aisea ua faafuasei ai le finagalo o Faimalomatumua i lenei faaiuga.. “Aisea sa le faasilasila mai le 6 ae lei faia le faigapalota?”

“O lea ua tapena le faamoemoe, e tauala atu i matou loia, e ave le tagi i le Fa’amasinoga ina ia fa’amalamalamaina vaega o le tulafono lea ua fa’avae ai i luga lenei fa’ai’uga…”

“O taga ia ua fai ina ia fa’atumauina ai pea le tula’i mai o le HRPP”.

I se faatalanoaga ma le Susuga ia Tuilaepa Sailele Malielegaoi ma le vasega o tusitala i le taeao nei, sa ia saunoa ai, e faateia foi le latou vaega faaupufai i le faaiuga ua faamautuina mai.

“Tatou te tetei uma a i le faaiuga…Ana faapea foi la o le sui tamaitai o le FAST lea e agavaa, e faapenei ua faaopoopo foi la se latou sui,…

Sa patipatia e Tuilaepa se lipoti a le nusipepa o le Samoa Observer i le aso ananafi, lea sa fesiligia ai le 9.8, ma faapea ai, e lei atoa le 10 pasene o sui tamaitai.

“Selau pasene le lipoti lea.. o le matuai lelei lava o le tagata sa ia faia lea lipoti..”

Sa faapea mai foi le Susuga ia Tuilaepa o le sa fai ma Palemia o Samoa mo ni tausaga se tele, o le Komesina sa tuuina atu le fautuaga, ae o le faaiuga o loo iai lea i le Ao Mamalu o le Malo.

“O le Ao o le Malo o loo iai le power,”

Saunoa foi Tuilaepa, o le Afioga i le Komesina o Faigapalota, o se tamalii e lava foi lona silafia i tulafono.

“O le Komesina, o ia foi o le loia faauuina..e tele lona silafia i le loloto o le tulafono..”

O le afiafi nei sa faalauiloa aloaiaina ai le avea o le Afioga ia Tuala Tevaga Iosefo Ponifasio e fai ma sui o le FAST, ma ua atoa ai loa le 26 o sui o lenei vaega faaupufai e ui ina ua na o ni nai masina talu ona faatuina mai.

O le faaiuga lea ua faaopopoina ai le sui tamaitai ia Aliimalemanu Alofa Tuuau, ua atoa ai foi ma le 26 o sui o le vaega faaupufai o le HRPP (Human Rights Protection Party).

O le tai 26 ai o sui o vaega faaupufai e lua, e le mafai ai ona faamautuina se Palemene o Samoa. O le saunoaga a le taitai o le FAST, o loo loma nei a latou mataupu i luma o le Faamasinoga e le gata i le iloiloina o le faaiuga a le Komesina, ae faapea foi ma se tagi a le FAST e faasaga i le Sui o le HRPP ia Peseta Vaifou Tevaga, i se moliaga faamaoniaina (conviction) e le tatau ai ona avea ma se sui faipule.


Marieta H Ilalio