17 Setema, Apia, Samoa 2019Â O Tivoli Maee o se alii talavou mai le afioaga o Vaipu’a i Savaii. O le faamoemoe sa oo mai ai Tivoli i Upolu i le vaiaso nei o le fia faatumu lea o le pepa talosaga, mo avanoa faigaluega i nisi o galuega faavaitaimi i le malo o Amerika, e tauala mai i le faalapotopotoga o le Beneficial Future of Samoa lea o loo taitai ai le susuga ia Faamanu Alo Vaai.
O le taeao nei i le maota o teine tausimai i Motootua, na faagasolo ai le resitalaina faapea foi le faatumuina o pepa talosaga mo i latou o loo fia galulue ai i ia galuega.
Saunoa le alii o Tivoli Maee, o ia e lona fitu o le fanau e toavalu, ma o lona naunautaiga ina ia maua se avanoa galuega e fesoasoani ai i le atiinaeina o si o latou aiga i Savaii.
Sa faapea mai Tivoli, sa maua lana galuega i se tasi o pisinisi i Salelologa, e $150 i le vaiaso le totogi, peitai sa nofo o ia mo nai vaiaso ina ua gasegase, ae toe fo’i atu ua le toe maua lana galuega.
“O lo’u aunty e nofo i Upolu nei sa logo tala atu i le polokalame lenei, lea ua mafua ai ona ou sau”
Ta’ua e Tivoli, o lona naunautaiga pe a faamanuiaina i nei galuega, o le faaleleia lea o le fale o loo nonofo ai si o latou aiga, ma maua se taavale mo ona matua, faapea foi mea fai a le nuu.
Sa fesiligia e le Samoa Global News le faatautaiga o nei galuega, ae o le a foi tulaga manaomia mo i latou o loo tusi talosaga mai.
Na tali mai Enoka Sio, o se tasi o loo faatautaia le faatumuina o pepa talosaga, e lua kamupani i Amerika o le Hilton Fort ma le kamupani o le Coca Cola, ae tasi le kamupani vaa fagota i Amerika Samoa e igoa o le Long Line.
Saunoa foi Sio, e iva masina e faigaluega ai mo le Hilton ma le Coca Cola, ae ono masina e fagota ai i le vaa i Amerika Samoa. Taua e Enoka Sio, o loo sailia mai e le faletalimalo o le Hilton ni tagata faigaluega se 600, ae o le Coca Cola e 350.
O visa faigaluega e fitoitonu lava lona faatautaiga ma ia kamupani, ma sa ta’ua foi o loo manao mai se tasi o vaa laupasese (meli), peitai e lei sainia se konekarate mo lea kamupani, atonu e mafai ona faatino i se taimi i le lumanai.
E to’asefulu i latou ua malaga atu ma ua galulue ai nei i le vaa fagota o le Long Line i Amerika Samoa, ae o lo o tapena le aumalaga muamua mo le faletalimalo o le Hilton Fort i Amerika.
Ta’ua foi e le sui o le Beneficial Future of Samoa, o le totogi e pei o le Kesia (cashier) e tusa ma le $2,900 USD i le masina, e ese mai ai faamanuiaga e maua e pei o taavale ma nofoaga e nonofo ai aemaise taumafa. Ta’ua e Enoka Sio, pe latalata lava i le $5000 USD i le masina lona tuufaatasiga.
O le faagasologa o le talosaga e faatumu le pepa talosaga (application form) ona tuuina atu lea i le kamupani o le Beneficial Future of Samoa, faatasi ma le tusifolau, o le ripoti o galuega ma aoga sa iai (CV). O tausaga faatapulaa e mafai ai ona talosaga mo ia galuega o le 19- 50.
Na faailoa mai foi e faapea, o loo fesootai lenei faalapotopotoga ma lo tatou malo i le faatautaiga faapea ai foi le ofisa o le amupasa o Amerika i Samoa nei.
O se avanoa faaauro e pei ona taua e le alii na malaga mamao mai i le motu tele i Salafai, le fia maua o le avanoa mo galuega faavaitaimi i Amerika, Kanata ma Amerika Samoa.
“E taua le avanoa ma afai ou te maua o le a ou faaoga tatau”.
Mo nisi faamatalaga fesootai Alo Faamanu Vaai – 841 2125.
