O le afiafi ananafi i le faletalimalo o le Sheraton i Vaisigano na faafeiloai ai e le malo o Samoa le aumalaga mai le malo o Saina i le ‘ava o le feiloaiga.
E silia i le 200 le aumalaga o tagata faipisinisi mai lea malo atoa ai ma sui minisita e 30, faapea sui o le au fai nusipepa o loo taitaia mai e le alii sui Palemia o lea malo, o Hu Chunhua.
Sa molimauina ai e lenei aumalaga le aganuu a Samoa pe a taunuu malo, e ala i le faatinoga o le ava o le feiloaiga e nisi o le au faigaluega mai matagaluega a le Malo.
O minisita o le kapeneta faapea faauluuluga o nisi o matagaluega sa auai e faafeiloai atu i le aumalaga.
Ua talafeauga lelei le taunuu mai ma le faamoemoe o le fonotaga i tulaga tau tamaoaiga lea o le a faataunuuina i le Aso Gafua o le vaiaso nei
Sa faapea foi ona sainia ni maliega (MOU) i le va o lea malo ma nisi o matagaluega o le atunuu, aua lava feaoasoani e faamatuu mai e Saina mo Samoa.
E tusa ma le 7 maliega i le va o lea malo ma lo tatou foi malo na sainia i le afiafi ananafi.
O aoga a le St Therese, Lepea ma Apia Primary sa faasalalauina o le a faamanuiaina i le maliega sa sainia ma le Matagaluega o Aoga.
O lua maliega ma le Matagaluega o Pisinisi Alamanuia ma le Leipa, lua maliega ma le Matagaluega o Faatoaga ma Faiga Faiva, ae tai tasi maliega ma le Matagaluega o Galuega ma le Matagaluega o le Va i Fafo.
O se tasi o tulaga taua i lenei faiga malaga o le faamautuina atili ai lea o faiga paaga i le va o lea malo ma Samoa e ala lea i mataupu e aoga mo le ariinaeina o malo e lua.
(1)
