Autasi le Vasega o Faatonu i le Latou Faaiuga: E lē o se Fasioti Tagata Faamoemoeina

0
2123

I le maea ai ona iloilo e se vasega faatonu le mataupu i le molia ai o ni alii talavou se toafa i le fasioti tagata faamoemoeina (murder) sa latou tuuina mai ai se faaiuga ua autasi iai so latou finagalo e faapea:

“E te’ena le moliaga o le fasioti tagata faamoemoeina ae faamaonia le fasioti tagata pa’ivalea (manslaughter) mo I latou uma e toafa sa tua’ia i le maliu ai o se tamā 43 tausaga mai le afioaga o Sapulu i Faleasiu.

O Fasipa Matuu ma Milo Lilomaiava, o se tausoga mai Sapulu i Faleasiu, faapea Wesley Puka ma Peato Upu, o se au uso mai le afioaga o Tufulele, lea sa tua’ia.

O le vaiaso atoa sa faasolo ai taualumaga o le faamasinoga i luma o le tamaitai Faamasino ia Tologata Tafaoimalo Leilani Tuala-Warren.

I le folasaga a le tamaitai faamasino, na ia saunoa ai e ave lana faamamafa i le vasega o faatonu “e tāua lo outou sao ma le tou pito laau”.

Sa ia toe faamanatu i le vasega faatonu, poo a ni faamatalaga sa faalogo ai i se tasi, poo luga foi o leitio poo upega tafailagi, poo se isi foi, e tatau lava ona faataatia ese, “ae faatino la outou pito laau i luga o molimau sa folasia faapea suesuega maumaututu o lenei mataupu.”

Saunoa foi Tafaoimalo, “afai e toafa nisi o le vasega o faatonu e ‘au tasi so latou finagalo, o le faaiuga lena e talia e le faamasinoga, peitai, afai e le ausia le fuainumera e toafa e au tasi i se faaiuga, o lona uiga e tatau ona toe faa’auau suesuega..”

O lenei mataupu sa tulai mai i le Aso 3 o Fepuari 2018 i se fe’eseeseaiga i le va o i latou ua molia, faapea le tamā ia Pei Aumalii, lea ua maliu.

E toa 18 molimau a le itu a leoleo sa valaauina e aofia ai ma alii leoleo e toalua sa faatinoina le suesuega (investigating officers) faapea le alii fomai sa faafoeina le taotoga faapitoa.

O le molimau a le fomai faapitoa sa faia le taotoga i le tino maliu (coroner’s report) sa ia taua ai o manuaga i le ulu sei tulou, ma manuaga i lona fatafata, sa oo ai le maliu i lea tamā. “Blunt force injuries to head and chest.”

Peitai e lei mafai e le fomai faapitoa ona tali manino mai, poo lea tonu se ituaiga gaioiga na mafua ai manuaga ona sa ia tāua, e tele ni itu eseese sa ona tulai mai.

Ua poloaina nei e le tamaitai faamasino se ripoti mai le ofisa faanofo vaavaia (probation) e fesoasoani i se faasalaga o le a tuuina mai.

O le a toe valaauina lenei mataupu ia Iulai mo le tuuina mai o se faasalaga talafeagai e le afioga i le tamaitai faamasino.