Ausia e Samoa se Matātia Tāua i le Faalauiloa Aloaia o le Tupe Pepa $60 Talā

1
170

I le saunoaga autu a le Afioga i le Minisita o Tupe, Mulipola Anarosa Ale-Molioo i le faailoa aloaiaina o le tupe fou $60 tala e faailoga ai le 60 tausaga o le tutoatasi o le Malo o Samoa, sa ia faamanino ai nisi o tulaga tāua o loo faamanatuina e lenei matātia fou ua oo iai Samoa.

Please Keep Samoa Clean.

Lau Susuga i le Taitai o le Sauniga

Lau Afioga i le Ao Mamalu o le Malo o Samoa Lau Afioga i le Sui a le Fono a Sui Tofia

Lau Afioga i le Palemia ma le Kapeneta

Lau Afioga i le Fofoga Fetalai ma Sui Mamalu o le Palemene

Lau Afioga i le Faamasino Sili ma le Ofisa o Faamasinoga

Sui o Malo mai Fafo

Faauluuluga o Matagaluega ma Faalapotopotoga a le Malo

Sui o Pisinisi Tumaoti

Susuga i auaunaga totofi a le Atua i soo se fata faitaulaga i tafa e fia o Samoa ma le lalolagi o lo o faanono manu aua se manuia o Samoa faapea le mamalu tauee o Samoa ua potopoto

O lea ua mapu i le tuasivi le fagotaga a le manusina, auā faiva o le Alii-seu o le Talalelei, sula le alofa ma le agalelei o le Atua o Samoa e ala i le manavaga paia i le susuga i le taitai o le sauniga, lau susuga Latu Latai.

O le faafeagaiga taulagi aua le afio o Alosina, le Fuaifale o Salevalasi, le Faletolu ma le Vaigalepa ma upu ia Tuisamau. Faamalo le sauni faafetai le tapena. Ia agalelei le Atua ma utupūpūina fulu o le segaula aua le feagai ai ma le valaauina.

E muamua foi ona ou faatulou auā le malae i Falefatu, i le afio o le matua ia Tofaeono, Asi ma Patu, alalata’i i laua na ta’i ia Tamapua ma Manogiamanu ma le nofo ituaiga ia Fuata.

Oute faatalofa ma ofo alofa atu i le paia maualuga ua aofaga potopoto i Falefatu nei, e molimauina lenei faamoemoe faapitoa o le faailoaina aloaia o le $60 Tala Tupe Pepa fou, e faamanatu ai le atoaga o le 60 Tausaga o le Malo Tutoatasi o Samoa.

O lenei tupe pepa ua faailogaina, ua le gata o se matāti’a taua mo le Faletupe Tutotonu o Samoa i le atinaeina o tupe a le atunuu, ae mo le atunuu atoa foi. O le uluai taimi lenei i le tala faasolopito o tupe pepa a Samoa o le a tuuina atu ai le 60 Tala mo le faataamilosaga o tupe ma fa’aaoga ai i totonu o le atunuu. O se faiga tu mati’e e faamae’a ai le faamanatuina o le 60 Tausaga o le malo saoloto o Samoa.

MAMANU O LE TUPE PEPA

O le tupe pepa o lo o atagia ai le faailogaina o se “TAEAO FOU”, o le amataga o se aso fou, ma o se faailoga o le faamoemoe ola, ma le faafouina, ao tatou faamanatuina se suiga taua i le tala faasolopito o Samoa.

O le Tamaitai Palemia muamua o Samoa ua filifilia e fausia se moemoe fou mo tagatanuu o Samoa.

O lenei tupe pepa fou o lo o iai le ata o le Palemia Tamaitai muamua o Samoa, le Afioga ia Fiame Naomi Mataafa, talu mai le 60 tausaga o avea Samoa ma malo tutoatasi.

O le isi itu o le tupe o lo o iai le ata o le uluai Palemia o Samoa, le Afioga Fiame Mataafa Faumuina Mulinuu II, ao ia tau’aao ifo ina i lalo le tagavai o le Malo o Niu Sila i le tatou uluai tutoatasi.

O le isi foi tulaga maoa’e o le tupe lenei, ona o ata o le tamā ma lona alo tamaitai, oi laua uma ua tofia i le Ofisa o le Palemia – i totonu o le 60 tausaga talu ona tutoatasi Samoa.

O lo o atagia ai foi i le tupe pepa le autū o le faailoga aloaia o le 60 Tausaga o le Tutoatasi le “Folau ma le Faatuatua” faapea le mau tauave a le atunuu e “Faavae i le Atua Samoa”.

O lo o faaalia foi i le tupe pepa mo le uluai taimi, se taimi muamua ua saini faatasi ai ni tamaitai i se tupe pepa talu mai ona lolomi ia tupe pepa a Samoa

– o le saini a le uluai tamaitai Minisita o Tupe, faatasi ai ma le uluai tamaitai Kovana o le Faletupe Tutotonu.

O lenei 60 Tala pepa ua le gata na faamanatu ai le 60 tausaga o lo tatou malo saoloto, ae o se maualuga ausia foi mo tina ma tamaitai o Samoa, e iloga ai le tulaga ese o le faataua o faiva o tamaitai i le aganuu a Samoa, e agatonu ai le alagaupu a le atunuu “E au le ina’ilau a tamaitai”.

O FOLIGA AGAGATA O LE TUPE PEPA

Na faailoa mai ia te a’u o lenei tupe pepa o lo o aofia ai ni suiga taua faa- tekonolosi e faamalosia ai le puipuiga mai ni lomiga faa-solitulafono. Mo se fa’ataitaiga:

(i) O lo o aofia ai se filo faamalama lanu moana ma le lanu meamata e faigata ai ona lolomi faasolitulafono nei tupe pepa;

(ii) Lanu fou mo le faafaigofie ona iloa o le tupe fou;

(iii) Faailoga o le puipuiga o loo faaoga ai le mamanu o le fugalaau a le atunuu, le Teuila;

(iv) O lo o iai ma le vase lanu auro iila i autafa o le faailoga o le teuila e tusa ma le 14 milimita;

(v) O le gaosiaina o lenei tupe pepa sa faatino i se tulaga e faaitiitia ai aafiaga i le siosiomaga;

FAATAAMILOSAGA

Mo le silafia e le mamalu o le aofia, o lenei tupe pepa fou $60Tala o le a tuuina atu i le atunuu e auala atu i faletupe o fefaatauaiga i le aso 31 Me 2023, ma o se tupe ua faatulafonoina e pei lava o isi tupe pepa poo tupe siliva. O le aofaiga o nei tupe pepa faapitoa na lolomiina e iai le tapulaa, ma o le tulaga manino o le a oo ina avea ma mea totino faamanatu a tagata e latou te aoina ma teu faameaalofa tupe (note collectors ) mai soo se vaega o le lalolagi.

FAAFETAI

E fia faaleo le agaga faafetai i le De La Rue mai le Malo o Peretania Tele mo le latou lagolagosua i le Faletupe Tutotonu o Samoa e ala i lenei galuega taua ua faamaea i le manuia i le lolomiina o lenei tupe pepa fou.

Ae lei faamaeaina se tautalaga, e fia oo lava se faamatalaga e faafetaia ai le Faletupe Tutotonu – Le Komiti Faatonu, Pulega ma le Aufaigaluega ona ua faaiuina ma le manuia lenei galuega e faamanatu ma patipatia ai le atoaga o le 60 Tausaga o le tatou malo saoloto.

I lea la tulaga, oute fiafia e faailoa aloaia le 60 Tala tupe pepa a Samoa.

Faafetai.

Soifua ma ia manuia.