Ua auai atu nei se sui o le Matagaluega a Leoleo e aoaoina o ia e le FBI (Federal Bureau of Investigation) a Amerika i mataupu ma tomai tau faaleoleo nanā.
O le Aso Toanai na sei mavae atu nei sa malaga atu ai Solomona Natia i le sitete o Virgina i Amerika mo aoaoga faaleoleo nanā mo le tolu masina.
E pei ona tā’ua e le Sui Komesina o le Matagaluega o Leoleo, le afioga Papalii Monalisa Tiai-Keti, o se avanoa lelei tele lea mo le Matagaluega, ua mafai ai ona faatasi atu se sui mo le sailiga o lea foi tomai faapitoa, e faatino ai suesuega faalilolilo.
“E agai lea i faiga faasolitulafono o loo fafauina, e aafia ai totonu lava o le tatou atunuu, faapea foi soligatulafono faavā-o-malo.”
O nei tapenaga uma o loo aofia ai i sauniuniga a Samoa e talimalo atu i le fonotaga tele o Taitai o Malo o le Taupulega (CHOGM 2024).
O Solomona Natia o se alii loia faauuina, ma ua silia nei ma le luasefulu tausaga o galue i le Matagaluega o Leoleo. O le taimi nei, o loo galue o ia i le vaega o le Prosecutions.
“E tolu masina e to’esea ai o ia ma le faamoemoe e toe taliu mai Solomona e faasoa ma fetufaa’i i totonu o le Matagaluega, i ona tomai ma agavaa sa aoaoina ai, auā le fa’aa’upegaina o le aufaigaluega i nei tomai moomia.”
