I le faamautu mai o le fainumera ua oo iai le faitau aofai o lo tatou atunuu ua maea ona tui puipui mo le misela, sa saunoa ai le Alii Palemia o Samoa le Susuga ia Tuilaepa Sailele Malielegaoi, e ‘aua tatou te soona faitio ia i latou o loo fefefe pea e tui a latou fanau iti.
Ua 93% le aofai o tagatanuu ua maea ona fai a latou tui puipui ma sa faapea mai Tuilaepa e na te talitonu o loo iai lava nai fanau laiti e lei tuiina ona o le tulaga o loo fefefe pea matua i le tui talu ai le fanau sa maliliu i Safotu ina ua maea a la tui puipuia MMR.
“E iai lava le masalosaloga fo’i lele o loo iai a ni fanau laiti, ona e iai latou o loo iai le fefe ma malosi tele le talitonuga, e tui loa feoti. E afua fo’i la ona o mea na tutupu e pei o nai tamaiti e toalua ia na maliliu i Savaii;
“E le mafai fo’i la ona tatou soona faitio ia i latou, i latou ia e le talitonu, ona o tulaga fo’i na tutupu na mafua ai ona fai suesuega faapitoa i lena fo’i taimi.”
Ua faailoa e le Alii Palemia, o le a iloa i le maea ai o le feiloaiga a le kapeneta le faaauau ai ma le faamuta o le vaitau o le faaeteteete lea o loo iai nei lo tatou atunuu ona o le faamai o le misela.
“E iai le faamoemoe ua pasi le tulaga matautia ae o lea ua toe foi tatou i le tulaga taugamalie i tiute masani e tatau ona fai ma faauau.”
(0)
