Tusia: Pesetā Tusiga Taofiga, Sooupu a le Malo. O le namu, e tautu’ufua i nofoaga o lo’o to’a ai le suāvai, ma vaega e le’o o’o i ai le galuega fa’amamā i aso faiso’o.
E le’o fa’aitiitia tagata pesia i le Fiva o Ponāivi aemaise i fanau ua 15 tausaga ma lalo ifo le mātutua, lea lava ua fa’amauina le o’o atu i le to’a6 fanauiti ua māliliu ai.
Ua manatu ai le Mālō, e ui e le’o mapu le tau’alaga i nu’u, ‘āiga, ekalesia, pisinisi ma ā’oga ina ia tausisia le tumamā lautele, peita’i ua tatau loa, ona uia se isi la’asaga e unā’ia atili ai pea le atunu’u atoa ina ia ‘ave le fa’amamafa, ma galulue punoua’i e fa’amamā Samoa atoa ma tausia le soifua mālōlōina.
O le ala lea, ua atofa ai e le Kapeneta le Aso To’ana’i nei, 16 Aokuso 2025, mo le galuega fa’amamā mo le atunu’u atoa.
O lona uiga, e fa’amalosia ma e tatau lava ona galulue tagatānu’u uma o Samoa, e opogi ma fa’amamā lotoifale o ‘āiga, ekalesia, nu’u, pisinisi ma ofisa uma o le Mālō.
O lea gaioiga o se fesoasoani tele mo le tineia o le namu o lo’o fe’aveā’ia le Fiva o Ponāivi.
Saunoa le afioga i le Palemia iā Fiame Naomi Mataafa i le feiloā’iga ma Tusitala i le asō;
“A’o fa’aauau ai pea galuega mo le fa’amamāina o tatou afio’aga tauala atu i le Matāgaluega o Tinā ma Tama’ita’i, Atina’e o Nu’u ma Agafeso’ota’i, ua finagalo nei le Mālō ina ia atofaina le aso fa’apitoa mo le fa’amamāina o le atunu’u atoa i le Aso To’ana’i, 16 Aokuso 2025.
“E tatalo atu i le mamalu o le atunu’u ina ia tatou galulue fa’atasi e unā’ia lenei fa’amoemoe ina ia fa’atama’ia nofoaga o lo’o tu’ufua ai namu.
“O lea ua amatalia le aoina o lapisi mamafa ananafi, Aso Lulu, 13 Aokuso, ma o le ā fa’aauau i le Aso 20 ma le 28 o Aokuso, fa’apea le Aso 3 o Setema, ae o lo’o fa’aauau e pei ona masani ai le aoina fa’alua o lapisi mai ‘āiga i vaiaso ta’itasi.
“O lo’o taofia mo le taimi nei, le fanaina o afio’aga [fumigation operation] a’o fa’agasolo ai galuega mo le fa’amamāina o le si’osi’omaga, ona toe amatalia ai lea i se taimi talafeagai.
“O lo’o fuafua fo’i e toe fa’atino nisi a’oa’oga talafeagai mo afio’aga i le lumana’i e ala i le fa’aāogaina o meafaigaluega ma le suiina o vailā’au mo le fanaina o nofoaga o lo’o tautu’ufua ai namu.
O le tatalo ma le tu’uālalo a le afioga i le Ta’ita’i o le Mālō;
“Samoa e, e talosagaina pea lo tatou galulue so’oso’otau’au e unā’ia galuega uma mo le tineia o nofoaga o lo’o tu’ufua ai namu, aemaise lo tatou pulunaunau e fa’amamā maota ma tuāmaota, o ‘ā’ai ma faoā’ā’ai, e pei ona o tatou masani ai i aso ta’itasi.
“E lē itiiti le agaga fa’afetai tele i le pulega mamalu a ali’i ma faipule, o faletua ma tausi, sa’oao ma augafa’apae fa’apea le malosi o nu’u i le fesoasoani mai i taumafaiga uma a lo tatou Mālō, mo le tineia o lenei fa’ama’i.
“E fa’apea fo’i ona o’o atu le fa’afetai i Fa’alapotopotoga Tumā’oti ma pisinisi i le atunu’u, aemaise le aufaigaluega a le Mālō i lo outou sao tāua, i le tali atu ai i le pepesi o lenei fa’ama’i mata’utia.
“E tumau pea lo tatou fa’atuatua i lo tatou Matai Sili i le Lagi, i lona alofa tunoa ma ona ‘ā’ao fa’amālōlō i luga o ‘āiga uma o Samoa ma ona tagata, a’o tatou feagai ai ma lu’itau fa’alesoifua mālōlōina i lenei vaitau.”
Special Notice
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
