O se Aso Sa o Tamā faanoanoa mo le aiga o se tasi tama na maliu ina ua agai atu i le sami e taumafai e toso ese se i’a na pa’ulia i gatai o le latou afioaga i Lano.
E 41 tausaga o le tama ia Amoni Malaeulu e fai lona toalua ma e toalima nai o la alo, sa maliu i se faalavelave na tulai mai i le Aso Sa o Tama.
E pei ona faamaonia mai e le Komesina o Leoleo, afioga ia Auapaau Logoitino Filipo, na osofa’i e malie lenei tamā ao ia taumafai e toso ese le manua (dolphin) sa pa’ulia ona ua amata ona manogi, sei tulou.
Saunoa Auapaau, “E tusa ma suesuega a leoleo, o le manua na paulia i le afioaga o Asaga i le taeao o le Aso Toanai, peitai, na sua mai le tai ma feavea’i ai e galu ma toe pa’ulia ai i le afioaga o Lano.”
O le manogi lē lelei na agai ane i uta ona ua leva na mate le i’a. I suesuega a leoleo, e faapea na fai atu ai loa le tua’a o lē ua maliu i si ona atalii, e alu i le vaa, e taumafai ona tosotoso le i’a i tai o le sami e tafea ai ona ua manogi.
Na agai atu Amoni, peitai, o le toto o le i’a o loo mate na lalata mai ai malie ma osofai ai lea tama mai le afioaga o Lano.
I nisi o faamatalaga a e sa latou molimauina le faalavelave, e le tasi se malie na osofai ia te ia.
Sa toe faanatinati atu nisi o le afioaga e taumafai e laveai mai peitai e lei mafai ona faasaoina lona ola.
Na faamaonia mai e le Komesina, o le aso ananafi le Aso Sa o tamā, i le ma’ea ai o toanai a aiga, na tulai mai ai le faalavelave.
“O loo taoto nei le tino maliu o sia tamā i le fale maliu i Safotu Savaii.”
Ua tele ni feau faamaise mai aiga ma uo a le tamā ia Amoni Malaeulu, e molimauina ai ona uiga taufaasia, ma siufofoga fiafia i taimi uma o feiloaiga faaleaiga.
Ua momoli mai ai foi se feau faamaise a le Komesina o Leoleo mo le aiga o Amoni.
“Ia faamaise le Agaga o Le Atua ona o le toesea ai o le tamā i le aso tonu lava o loo faatauā ai tamā i totonu o si o tatou atunuu.”
[starbox]
