O le Aso Gafua 3 Iuni o le a sisi ai le tagavai a le atunuu

"Ae o se avanoa foi e taoto atu ai i afioaga ma fono faavae a itumalo mo latou lava faatinoga o le faailogaina o le tutoatasi.."

0
62

Ona o le tausaga nei e pa’ū ai le aso muamua o Iuni i le Aso Toanai, lea o le a faatino ai le polokalame o le sisigafu’a i le Aso Gafua 03 Iuni 2024.

O le Aso Gafua 3 Iuni o le a sisi ai le tagavai a le atunuu, ona faasolo ai lea o savali a aoga, faalapotopotoga ma fale faigaluega.

Sa faailoa mai le polokalame e le komiti o le sisigafu’a, le afioga iā Agafili Tomaimano Shem Leo faapea le afioga ia Tanuvasa Petone Mauga.

“O le Aso Sa 02 o Iuni o le a faatino ai le sauniga faafetai i le malumalu a le Ekalesia Katoliko i Mulivai, ae o le Aso Gafua 3 Iuni e sisi ai le fu’a ma faatino ai le tula’i faaaloalo, faapea solo a aoga ma faalapotopotoga ma fale faigaluega e pei ona masani ai i tausaga taitasi.

“O se tausaga ese lenei o le a leai ai ni faafiafiaga ae o le a faaiu i le saunoaga a le taitai o le Malo, ma tapunia aloaia ai le faamanatuina o le 62 tausaga o le tutoatasi o le atunuu.”

Saunoa Agafili, “O le tausaga nei o le a amata mea ai se tulaga ua pasia e le kapeneta e ta’i lima tausaga ma faailoga le tulaga e pei ona iai le faamanatuina o le 60 tausaga talu ona tutoatasi le Malo o Samoa.”

“O lona uiga o le tausaga 2027 o le a atoa iai le 65 tausaga talu ona saoloto mai Samoa i pulega faakolone mai Malo fafo.”

“Ae o se avanoa foi e taoto atu ai i afioaga ma fono faavae a itumalo mo latou lava faatinoga o le faailogaina o le tutoatasi..”

Ua faamanatu mai foi e le komiti tulaga o le saogalemu o le a galulue vaavaa lua ai le matagaluega o leoleo ma le auaunaga fesoasoani muamua i le tineimu.

CEO Ministry of Prime Minister and Cabinet Agafili Tomaimano Shem Leo and Commissioner of Fire and Emergency Services, Tanuvasa Petone Mauga