O le a avea le Aso Sa mulimuli o le masina nei, 25 Aperila 2025 e faataunuu uma ai sauniga Misisā Paia a Matagaluega uma o le Pule’aga a Samoa Apia, e manatua ai le ta’ita’i aoao o le Ekalesia Katoliko i le lalolagi.
O le Aso Gafua o le Eseta 21 Aperila na tuumalo ai Pope Falanisisi i le 88 o tausaga o lona soifua.
Ua faailoa faalauaitele e le Faauluuluga o le Ekalesia Katoliko i Samoa, le afioga i le Akiepikopō Mosese Vitolio Tui i luga o le ala ata a le Ekalesia le Upu Mana, o le a lē malaga o ia i toe sauniga o Pope Falanisisi, ae o le a tapena sauniga faamanatu mo Samoa nei.
Saunoa Mosese, “O le a avea le aso Sa mulimuli o Aperila o Iesu le agaalofa e osia ai sauniga paia faale matagaluega e manatua ai le tamā paia Pope Falanisisi..
“E tatalo atu ai i puleaga lata mai i Apia, o Vailele, Vailima, Vaoala, Malōlōlelei, Lepea, Vaimoso ma Siusega, o le a faia le misisā faale puleaga i le malumalu i Mulivai i le itula e 5:30 i le afiafi, tatou te momoli ai le faigamalaga a le tamā paia.”
O le Aso Gafua na faailoa mai ai e le Vatikana i Roma, le tuumalo ai o Pope Falanisisi, o lē sa avea ma faauluuluga o le faatuatuaga a le Ekalesia Katoliko.
Na soifua mai Pope Falanisisi le Aso 17 Tesema 1936 i Buenos Aires Argentina ma o ia o se mūa’i tofiga mai Amerika i Saute (first Latin American).
Na filifilia o ia i le tausaga 2013 e avea ma faauluuluga o le Ekalesia Katoliko i le lalolagi atoa, seia oo mai i le taimi na faamanava ai e Le Atua ana galuega i le Aso 21 Aperila 2025.
Faalauiloa Tāua mo le Aso o Tinā
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
