Sooupu a le Malo, Aso Faraile 30 Tesema 2022. O le asō na afea ai e tamafanau a le atunu’u o lo’o ta’a’alo mo le Toa Samoa fa’apea nisi o le pulega, le nofoaga i Mapuifagalele o lo’o tausia ai nai tinā ma tamā mātutua po’o matua tausi.
O le agaga o lenei asiasiga, e toe momoli ai le fa’afetai fa’apitoa i matua tausi o e sa faia le faiva o le tapua’i leoleoa po’o le pati ta’oto a le Fe’epo, e ala i le tatalo ma anapopogi, a’o feagai ai le Toa Samoa ma le ta’amilosaga o le Ipu o le Lalolagi i lenei tausaga, lenei ua a’e manuia.
Na molimauina i le aoauli nei, le loifofoga maligi o tinā ma tamā mātutua ona o le fa’aeaea ma le mauāluga o le fa’aaloalo ua tumatila ai Samoa ona o lenei fa’agatama fa’avāomālō.
Na taunuu mai le au taaalo faapea le pulega a le Toa Samoa i laufanua o Samoa i le amataga o lenei vaiaso.
O loo nonofo i latou i le Return to Paradise i Matautu Lefaga. O le Aso Tofi sa faia ai se faigalotu ma se solo tele i Apia (parade). E faaoo foi se feiloaiga faapitoa ma se taumafataga ma le Malo o Samoa i le po o le Aso Faraile ma fai Tausaga Fou ai latou i Samoa nei, ma toe tuua ai Samoa i le vaiaso fou.
(10)
