Asiasi Atu le Palemia ma le Kapeneta i Falemai Faaitumalo

0
267

27 Novema 2019. E ui i le tele o galuega ma tiute e feagai ai ma taitai o le atunuu, peitai e lei tuua ai le asiasi atu i maota gasegase i nuu i tua i le aso ananafi.

Na ta’ita’i e le afioga i le Alii Palemia Susuga Tuilaepa Lupesoliai Sailele Malielegaoi le asiasiga faatasi ai ma Minisita o le Kapeneta. O le auga o le asiasiga ina ia faaoo atu le agaga to’afimalie i le atunuu aemaise matua fememea’i i lenei taimi o le faama’i. E le gata i lea ia faailoa atu o loo tu atu le malo e aapa atu e fesoasoani i soo se itu a’o feagai ai ma tiga o le faamai o le misela.

PM visits hospitals across Upolu. PC: Gvt Press.

O le isi itu taua, ina ia fesootai atu le malo ia i latou o loo i le faatinoga o galuega, ma ilo poo a o latou manaoga, aemaise mea o loo manaomia i le taimi nei mo le faama’i.

E tiga matuitui le vaaiga ma faalogona ia i latou ua maumau le soifua, aemaise i fanau, e pele i o latou matua, a’o iai la i ia lagona lo tatou atunuu, o se faamafanafanaga sili le oo atu o ta’ita’i e pa’i atu, ma ofo alofa atu e tau faatoafilemu ai le mafatia ona o fanau o loo feagai nei ma mai tiga.

PC; Gvt Press Secretariat

Sa asia e le malo falemai e pei o falemai faaitumalo i Poutasi, Lalomanu, Leulumoega ma Faleolo. O le aso ananafi lea na tuuina mai ai le ripoti lona 10 o le faamai o le misela, ua faailoa ai e tusa ma le 32 i latou ua maliliu i lea faama’i i le taimi nei.

O le toatele o e ua maliliu, o pepe ei lalo mai le 12 masina ma le fanau 1-3 tausaga ae tatolu tamaiti matutua 14-19 tausaga.


Maina Vai