Faa-Samoa

A’o tālia le lisi aloai’a o Taitaifono, e To’atolu Sui ua Mautinoa

January 6, 2026

333

6 Ianuari 2026, Apia Samoa, Faaliliu mai i le Faa-Peretania. I le taimi nei e le’i faalauiloaina aloa’ia e le Matagaluega o Tina ma Tamaitai, Atinae o Afioaga ma Agafesootai, suafa o Taitaifono ua tofiaina mo Fono Fa’avae (District Development Committees) o Itumalo e 51 o Samoa.

Ae e to’atolu Sui Faipule ua mafai ona faamautinoa lo latou tula’i mai i le tofi Taitaifono mo Fono Fa’avae a latou Itumalo.

O le afioga i le Sui Faipule o Safata 2, Tuia Logoiai Puʻa Fuatogi Letoa ma le afioga i le Sui Faipule o Vaimauga 4 ia Tiatia Graeme Tualaulelei sa faalauiloa e le Sususga ia Laaulialemalietoa Leuatea Polataivao Fosi Schmidt i lana feiloaiaga ma tusitala, ua tofiaina i laua uma e avea ma Taitaifono o Fono Fa’avae.

Ae o le afioga i le Sui Faipule o Faleata 2, e le’i iai ni Sui Tauva sa resitalaina aloa’ia mo le Faigapalota Tele ia Aukuso 2025.

O lona uiga, e leai fo’i la nisi sa mafai ona talosaga atu mo le tofi Taitaifono o le Fono Faavae mo Faleata 2, sei vagana ai Leatinuu Wayne Sooialo.

O Novema 2025 sa tapuni aloaia ai avanoa e tuuina atu ai tusi talosaga mo Taitaifono a Fono Faavae.

E tusa ai ma le faasalalauga faalauaitele mo nei avanoa (position advertisement), sa tatala le avanoa mo i latou uma sa resitalaina e tauva i le faigapalota tele o Aukuso 2025. E le’i tatalaina le avanoa mo le atunuu lautele, ae ua agavaa na o ē sa tauva i le palota.

Sa faailoa mai e le Palemia i lana feiloaiaga ma le vasega o tusitala, e iai le Tusi Tetee a le vaega faaupufai o le HRPP sa tapenaina ma tuuina atu faatasi ma tusi talosaga a Sui Faipule e toavalu.

Peitai, o le Sui Faipule o Safata 2 ma Vaimauga 4, sa leai ni Tusi Tetee na tuuina atu. Lea ua manuia ai a lā talosaga ma tofia ai e le Komiti Faapitoa, ma faamaonia e le Kapeneta.

Sa faailoa mai fo’i e le Palemia, ina ua tapunia le taimi sa faatapulaaina mo tusi talosaga, e to’afa (4) ni Sui Faipule e le’i oo atu ni a latou tusi talosaga.

**Samoa’s leading provider of ICT Solutions.**

Sa saunoa le afioga i le Palemia, o lenei faiga fou e tō mai i lesona tāua sa maua mai i le faatinoga o le Poloketi Miliona i ona ulua’i tausaga (lessons learnt). Ma o se faiga fou e faamautinoa ai le tofiaina o nisi e o gatasi o latou talitonuga ma le sini autu o le poloketi.

Peitai, ua faailoa le lē fiafia o le Taitai a le Itu Agai le afioga ia Tuilaepa Sailele Malielegaoi, ma ia tu’uaia ai le faigamalo i faiga faaalatua.

Saunoa Tuilaepa i sana Tusi i le Faatonu i le gagana peretania, o se auala e tofia ai e le Malo sui tauva a le FAST e le’i manuia i le Fagapalota, ma fai ai o se faatosina mo le isi faigapalota.

Ae ua saunoa le Palemia ia Laaulialemalietoa, ao alo atu Samoa mo lana faigapalota, sa lē lagolagoina e le HRPP le Poloketi Miliona mo le Atinaeina o Afioaga (District Development Programme).

I le anavatau a le HRPP, e tai $500 tala e tufa atu i tagatanuu uma o Samoa i se polokalame sa faalauiloaina o le COLA. Afai e faaaoga le tusigaigoa o le tausaga 2021 lea sa 205,557 ai le aofai o le atunuu, e alu ai lava se tupe faagagana e $110 miliona.

Ae o le anavatau a le FAST lea sa faalauiloa ai le siitia o le Polōketi Miliona, ina ia tofu le Itumalo ma le $2 miliona i le tausaga e faatino ai polokalame atina’e.

O le Aso 12 o Ianuari sa faalauiloa e amatalia ai galuega a Fono Fa’avae a Itumalo.