AMATALIA O LE LAASAGA 2 O PUIPUIGA MO LE KOVITI 19, (COVID19 LOCKDOWN).
SAUNOAGA A LE TAMAITAI PALEMIA, AFIOGA FIAME NAOMI MATAAFA: Aso 28 Ianuari, 2022.
O lea ua to i tua Apolima ma ua taumua lelei le Matautu, aua ua ta’ita’i mai le soifua o si o tatou atunuu i le alofa o le Tapaau Sili, ua aulia mai lenei taeao fou. Faamalo le folau ma le soifua laulelei.
O le aso ananafi na faamaonia mai ai le faaopoopo ai o le toatasi ua aafia i le siama o le Koviti 19, ma ua atoa ai le 27 o i latou ua faamaonia le aafia i le siama o le Koviti 19. O le iuga lea o le suesuega lona tolu sa faatinoina i le taeao po o le aso Tofi 27 Ianuari. – Ua faamaonia mai ai foi le manuia uma o le tatou aufaigaluega sa muaau i lenei galuega, ma o loo faanofoesea nei.
O lē ua aafia, o se tasi o le pasese o le vaa na malaga mai i Ausetaila i le Aso Lulu na sei mavae nei, 19 o Ianuari, 2022. O ia lenei, sa vava lalata lo latou fesootaiga ma nisi o le toaluasefulu o le pasese ua aafia, ma sa faanofoesea lava i le falemai i Faleolo.
Ua faamaonia mai foi i suega na ave i Niusila, e toaono ua aafia i le Omicron and toatasi ua aafia i le Delta, o ituaiga o le siama o le Koviti. E leai foi se faamaoniga o le iai o se isi ua aafia e ese mai ia i latou nei e 27 o loo faanofoesea.
O le ala lea, i le iloiloga a le Kapeneta ma le silasila ai i vaega e mafua ai ona fetuutuunai laasaga mo le puipuiga, ma talu ai o lea ua mautinoa o loo manuia a tatou aufaigaluega na muaau, i le maea ai o a latou suega lona tolu, ua faaiugafonoina ai e le Kapeneta, le suia o le Laasaga o a tatou Puipuiga i le Laasaga lua, poo le Lanu Moli.
O le Laasaga lona lua, e faatino i le tulaga ua iai i latou ua aafia, peitai o loo malu puipuia i totonu o nofoaga o loo faanofoesea ai, ma e leai se faamaoniga ua mama i tua le faamai. Ona o lenei tulaga, ua tagai ai le Kapeneta ina ia teuteuina Poloaiga mo Faalavelave Faafuasei e pei o vaega nei:
Poloaiga o Faalavelave Faafuasei – Laasaga Lua (Lanu Moli)
E tumau pea le tele o Poloaiga mo Faalavelave Faafuasei e pei ona iai le Poloaiga numera 63 sei vagana ai vaega nei:
- Toe tatala galuega, pisinisi, makeki ma auaunaga uma a le Malo;
- Faataga faatasiga ae tapu i le 30 tagata i taimi uma;
- Faatagaina na o vaalele e aumai ai uta ma oloa i Samoa seia iai nisi suiga;
- Faapafala faigamalaga mo tagata faigaluega faavaitaimi e malaga ese atu ma Samoa pe ulufale mai foi seia iai se taimi;
- Taofia uma faigamalaga mo tagata e toe foi mai i Samoa seia iai se taimi;
- Faaauau faigamalaga i le va o Upolu ma Savaii ae tausisia le va e lua mita o tagata uma;
- Tatala le taunuu mai o vaa oloa ma vaa suauu i Matautu ina ia faaauau pea ona maua oloa moomia mo le atunuu;
- Faatagaina na o taavale laupasese laiti (4 pasese); Mo pasi ia faatapulaa pasese ile 20 ina ia nonofo valavala
- Taofia le tatalaina o Aoga uma, ae unaia le faaaogaina o faiga faatekonolosi ma isi auala faaonapo nei e amata ai aoaoga; ma
- Taofia pea tamaiti e i lalo ifo o le 12 tausaga ona vaaia i nofoaga faitele.
O aiaiaga faasoifua maloloina e ao ina usitaia I le laasaga lona lua lenei, e aofia ai vaega nei:
- Faaaoga talifofoga i taimi uma;
- Tauave ma faaali Pepa Tui o le Koviti i taimi uma;
- Faamalosia le valavala o tagata e amata atu i le 2 mita;
- Faaauau le faiga o tuiga mo i latou e lei maea pe lei faia foi;
- Faaauau tuiga o suesuega mo i latou o faanofoesea;
- Amata le Tui lona tolu; ma
- Faasolo tuiga i falemai uma ina ua talafeagai.
E amata faamamaluiina nei suiga i le mae’a ai o le piliota o le tapunia o le atunuu i le 6 i le afiafi nei. O lenei fuafuaga ile Laasaga 2 e faaauau mo le 2 vaiaso ona toe iloilo lea.
Samoa e, matou te faamalo atu le fai tatalo ma le tapuai. O lenei ua masuiga malie le to’atugā na o tatou feagai, talu ona taunuu mai o le vaalele i le Aso Lulu aso 19 Ianuari. Peitai, o nei suiga ua fuafua ma le faaeteete ina ia mautinoa o loo saogalemu si o tatou atunuu, a o faagasolo pea suega ma le vaavaaia lelei o i latou uma ua aafia, atoa ai ma a tatou aufaigaluega na muaau i lenei galuega. Tatou te nono manū pea i lo tatou matai sili, ina ia malu tapu aaoina pea Samoa i ona aao alofa.
Ia manuia le agai atu o le atunuu i le faaiuga o lenei vaiaso.
Soifua
(0)
