Ua faataunuu nei ta’otoga faapitoa i se to’aono ua leva ona tālia mafuaaga na maliliu ai

0
1706

E loo faagasolo i le vaiaso nei ni taotoga faapitoa e faamautu mai ai le mafuaaga tonu sa maliliu ai se toaono o loo aafia i suesuega a leoleo.

O lenei to’aono e aofia ai ma le tamaitai pule o le TV3, o le alii pagota o loo masalomia le pule i lona ola, faapea ma se tamaitai Malu o le Malo lea na maliu i le vaiaso o le Kerisimasi.

O le pule sili o le TV3 sa maua atu lona tino maliu i lona maota i le faaiuga o Ianuari ma o le mau a leoleo, e le’i iai ni manuaga i lona tino. O le alii ia Kolani Junior Lam sa molia i le maliu o lona toalua o lē sa fai ma faauluuluga o se Matagaluega a le Malo. O loo masalomia le pule i lona ola ina ua inuina o ia se vailaau o loo faaogaina i faatoaga o le toese. Ae o le tamaitai Malu o le Malo sa maliu o ia i ni manuaga mai se laau malosi o loo moliaina ai se tasi sa fai ma ana paaga, ae o se leoleo foi.

O lenei toaono e aofia ai foi ma nisi o le atunuu mai nisi o faalavelave tula’i mai o loo faagasolo ai pea suesuega a leoleo.

Saunoa le Sui Komesina o Leoleo ia Papalii Monalisa Tiai-Keti, na amataina le galuega a le foma’i faapitoa i le Aso Toanai na sei mavae atu nei ma le faamoemoe e faama’eaina i le vaiaso lenei.

I se isi itu tāua, sa saunoa foi Papalii, o le a maua se avanoa i le vaiaso nei e tuuina atu ai i le fomai faapitoa (pathologist) le faila a le atalii lea na maliu ia Aperila 2021 i se faalavelave tau taavale ae e lei tū le avetaavale (hit and run).

Sa maliu le atalii ia Tuuau Maletino Faasavalu i le Aso 21 o Aperila 2021 i ni manuaga ogaoga sa masalomia ai o se taavale na taia ai o ia, ma tosoina lona tino i luga o le auatele.

E ui i taumafaiga a leoleo, e oo mai i le taimi nei e lei iai lava se tasi ua molia i lenei faalavelave. E tele foi isi mataupu tau hit and run i Samoa, e lei mafai lava ona maua taavale a ē na lavevea ai ē na aafia.

O le saunoaga a Papalii, “O le malaga mai o le fomai i le faaiuga o le tausaga ua tuanai atu, na faao’o ai loa iai se talosaga a le Matagaluega, mo se avanoa e silasila ai i faila o lea mataupu, poo iai foi ni vaega o misi, e ao ona toe galulue iai le vaega su’esu’e a la latou foi pito laau.”

“Peitai e le’i maua se avanoa i lea taimi ona o le tele o maliu sa faia iai ta’otoga.”

“Ae o le tulai mai o le fuainumera na’o le to’aono o tino maliu i le taimi nei, lea ua mafai ai ona faamautu mai, o lē tasi lea o vaega o le a silasila iai le fomai faapitoa.”