Alu ifo i luga faleoloa Saina ae alu i lalo faleoloa Samoa
“E le’o toe põ fo’i malaē i lenei vaitaimi, ua alu a’e i luga faleoloa Saina, ae alu ifo i lalo faleoloa o Samoa.., Aisea le mafuaaga?”
O manatu faaalia ia o le sui o Vaisigano Numera 3 ia Faaulusau Rosa Duffy Stowers i alumalelaga o le Palemene i lenei vaiaso.
O se faafitauli o loo faapea mai le tamaitai faipule, pe iai nisi o auala e mafai ona fesoasoani atu ai le Malo i o tatou tagatanuu fai faleoloa i nuu i tua.
E le’o ni fesoasoani tau tupe ae pe mafai ona aumai i totonu i latou e faatalanoa ma faasoa iai le malamalama, ina ia siitia pisinisi.
O le isi tulaga na faailoa o le tulaga o loo maitauina i oloa o loo faatau atu.
Saunoa Faaulusau “Pe le’o le isi tulaga lea ua oo mai ai faama’i, fai ma faataitaiga le pusa eleni lea e faatau mo faalavelave, ua faafia ona faatau mai ma toe faafoi atu i le faleoloa ae le o siaki poo ua expire.”
O le tulaga i le tuufaatasi o matagaluega sa au foi iai le fautuaga a le faipule o Vaisigano Nu 3.
Sa faapea mai o ia pe le mafai ona tuufaatasi le MCIL ma le Matagaluega o Tupe maua ia mautinoa e mafai ona iloa faleoloa uma, atoa ai ma kiliva o loo o i tua..
“O le tele o ia kiliva e o atu i tua e leai ni lisiti, e faafefea la ona iloa e le Matagaluega o Tupe Maua oloa ia e faatau atu e sau ai le tupe i totonu mai tax?”
O loo faasolo pea tali a le Malo e tusa ai o fesili ma fautuaga sa tuuina mai e sui faipule talu na amataina le Fono Faitulafono i le Aso Gafua.
(6)
