O le taligamalo a Samoa i le vaiaso nei e le gata i le au malaga a Saina ae faapea foi isi atunuu o le Pasefika o lea ua malaga mai e talanoa i tulaga tau le tamaoaiga, o a auala ma faiga e mafai e atunuu taitasi ona fefaasoa’i ai ina ia maua atinae ma pisinisi aua le sologa manuia o le tamaoaiga o atunuu taitasi o le Pasefika.
Sa molimauina ai le auva’a o alo ma fanau a Samoa latou te faaliliuina mai le gagana Samoa i le gagana Saina, mo se malamalamaga a e o loo malaga mai. E latou te mafai foi ona faaliuliuina le gagana Saina i le gagana faa Peretania mo nisi tagatanuu a le Pasefika o loo auai mai.
O le afiafi ananafi a’o nofonofo ai e faatali le taimi e amata ai le ava o le feiloaiga e faafeiloai ai malo mai Saina, sa maua ai se avanoa e talanoa ai ma nisi o fanau a lo tatou atunuu sa maua avanoa e aooga ai i Saina. O lea ua avea nei i latou ma tagata faaliliu i le aumalaga lea.
O nisi o i latou nei sa i Saina mo le tai 5 tausaga, o loo ua toe fo’i mai ma faailoga, ma ua faigaluega nei i le tele o matagaluega a le malo.
O isi o le vaega o le Fuimu ae o isi o le vaega o le LTA. E ese foi lagona na oo mai ina ua faalogologo atu o fetufaa’i i latou i le gagana Saina.
O le tasi lenei o naunautaiga i lo tatou Malo, e mafua ai ona saili ni avanoa i atunuu nei, aua o ai na iite e omai se aumalaga e augapiu ma se gagana faaperetania e silafia. A’o le tulaga e faafiafiaina ai, e lē o pogisa lava Samoa i soo se mea i lenei vaiaso, aua o lea ua iai a tatou tamafanau latou te faamalamalama i Saina o tatou manaoga, atoa ai fo’i ma lo tatou iloa lelei poo a tala o loo talanoa ai lea aumalaga ia Samoa ma ona tagata.
(0)
