Aveesea le Faipule o Salega mai le Komiti o Tupe a le Palemene

0
789

31 Me 2019, Apia Samoa. Ua tali fuaitau le alii palemia, Tuilaepa Sailele Malielegaoi e tusa ai ma le mataupu i le Sui Usufono o Salega, Olo Fiti Vaai lea ua lē toe iai o ia i totonu o le Komiti o Tupe a le Palemene talu mai tofiga fou sa faia i le amataga o le vaiaso nei.

Sa tulai le Sui Fofoga Fetalai o Nafoitoa Talimanu Keti e faalau mai le fetuunaiga fou o Komiti a le Palemene, lea ua sui ai Olo Fiti Vaai ia Namulauulu Sami Leota ma Ili Setefano Taateo.

I le saunoaga a Tuilaepa i lana polokalame ma le au tusitala i le vaiaso nei sa ia taua ai le mafuaaga ua le toe filifilia ai Olo i totonu o le komiti o Tupe.

“I le taimi e avanoa ai tofiga e pei ona faagafua ai le nofoaga o le faipule faasaleleaga numera 2, lea la ua sau lona sui e le faapea e okomeki a le tuu i totonu e tatau ona toe fetuunai atoa lava tofiga e
faaaoga ai le tomai o le faipule e toe fetuunai.

“O le mea taua aua e le tasi se komiti e tele komiti lea na tolaulau mai ma o loo iai Olo i isi komiti a le palemene e le faatauvaa foi isi komiti na e tuu iai.”

Sa saunoa Tuilaepa o uiga lava ia o le faipule o Salega e tulai ai loa se mataupu e aafia ai ia e manao lava e faalauaitele ina ia faatupu ai
le alofa o tagata ia te ia.

Sa ta’ua e Tuilaepa e le mafai lava ona aveesea ai le mea e tatau ona fai o le toe fetuunai lea o komiti i totonu o le palemene pe afai ua iai se sui fou ua iai.

Ae peitai, sa tali mai le Afioga ia Olo Fiti Vaai i le Samoa Global News, e faapea e leai se mafuaaga tatau na aveeseina ai ia mai le Komiti Tupe a le Palemene.

“Ua manino mai lava, o le aveeseina o au, o le ita o le Palemia ia a’u i mataupu ou te lagaina ma fesiligia ai le Malo;

“Pau lava lena o le mafuaaga lea ou te iloa; o le fefe i lana transparency lea e pese soo ai,”

O le isi itu sa taua e le Alii Palemia o le faalauiloaina lea o faamatalaga e tuuina atu e molimau i Komiti o le Palemene.

Sa taua e le Alii Palemia, “E le soona faia tulafono a le maota ma e le soona faia tulafono a le maota ona o molimau ia e faavae ai lipoti a komiti e aumai i totonu o le Palemene;

Ma e tāua tele le aumai mea moni e fausiana ai faaiuga a Komiti mamalu, a e lē mafai ona maua mea moni pe afai e faailoiana i se tulaga faalauaitele ia mau.”

Peitai sa ese foi le mau a le sui usufono a Salega, ma na ia taua ai, e maea loa ona faaoo mai ripoti i Komiti faale Palemene, ona fai loa lea ma faamatalaga e mafai ona tatalaina mo le silafia e le mamalu o le taunuu.

“E faaseseina MPs faapea e confidential faamatalaga e tuuina atu i le Palemene…pau a le taimi e puipui ai Komiti i faamatalaga o le taimi o loo faia ai iloiloga a le Komiti, ma e lei table ina le ripoti ile Palemene;

“Once e table ai se ripoti, it is then public information iaccording to Parliament Standing Orders.”

Sa tauina mai e Olo Fiti Vaai se kopi o nei tulafono faale Palemene.

Sa taua e Olo, o le isi itu sa faanoanoa ai, o le aiāina e le Palemia ma lana Kapeneta o galuega a le Palemene.

“O le aveeseina o a’u mai lea komiti na faatalanoaina e le Caucas a le HRPP ma approve e le kapeneta, ona avatu loa lea faaoga mai le Palemege e faaui mai ai le faaiuga”.

Peitai na saunoa le Alii Palemia o loo tāua tele foi isi Komiti a le Palemene o loo tuuina atu iai Olo.

“E le faapea foi la e taua le isi Komiti, ae lē taua le isi Komitii;

“Pau a le mea, ia alu e fai lelei ana tofiga; ae ua ou maua tala o lea ua nofo ma faasalalau, ua lē tofiaina o ia ona o ana amio na fai i aso ua tuanai;

“Ua toe nofo lava ia ma faasalalau mai ana amio na fai.”

“O lea sa fai sao a le iuga a le Palemene, ae o lea ua toe nofo lava Olo ia ma ta’u atu ana amio o fai.

“E nofo ma faalauiloa ona o lana mau o mea ia o public records, ae e lē o ni public record ia mea e molimau ai tagata.”

O le mau a le Afioga ia Olo, e fiafia lava ia e auauna i soo se Komiti.

“O a’u soo se komiki lava, I don’t mind oga e taua uma ia te a’u galuega a le Palemene, ae ou te manumanu i le integrity o le Palemene;

Pau le mea ou te fia ta’u atu i le Alii Palemia, taaalo mai i le polo, ae tuu le tagivale”.