O le aso toanai na seia mavae atu nei, na tauaao ai se meaalofa na tapenaina e le kalapu taavale a le No Cash, mo le nofoaga a tagata matutua, le Mapuifagalele. Sa saunoa le peresetene o le kalapu le susuga ia Mautofu Mamona, e lē o se taimi muamua lea ua latou faia ai se tulaga faapea mo tama ma tina matutua o le Mapuifagalele.
E faitau ta’ilua i le tausaga ma agai atu lenei faalapotopotoga e momoli meaalofa e fesoasoani atu ai i taupou sa o loo tausia nai matua. O le tausaga na tea nei sa matuai sii atu ai lava e le No Cash se faaili (band) e faafiafia mo tama ma tina matutua.
Saunoa le Peresetene, “E fai lava a matou suega seleni, ma maua ai le avanoa matou te faia ai ni galuega e faamalosiau atu ai ma fesoasoani ai mo e o loo moomia.. Masalo o le faalima ai lea ona matou oo mai e soosootauau ma tuuina atu se meaalofa faatauvaa mo le nofoaga nei”.
O le Taupou Sa ia sister Maria Frances Pale, na saunoa e fai ma sui o le nofoaga, e faafetaia le kalapu mo le foai tāua. “Matou te talia ma le agaaga fiafia le foai, manatu foi, e lē o le uluai taimi lea ua outou agalelei mai ai, ae matou te tatalo ia faamanuia atu pea Le Atua ia te outou ma outou fanau, faapea foi aiga”.
O le foai na tauaaoina; o taumafa eseese faapea nisi o mea e moomia tele aua le tausiga o matua, faatasi ai ma se seleni tupe e $1,000 tala.
Tā’ua e le peresetene o le No Cash, o le Mapuifagalele, o le nofoaga lea e amata ai le latou polokalame fesoasoani o lenei tausaga, o le isi fuafuaga o le a sosoo ai, o le agai lea e momoli meaalofa mo fanau o loo iai manaoga faapitoa faapea aiga o loo maitauina le lima vaivai, o loo iai foi le manaoga mo se fesoasoani.
O le tausaga na mavae atu nei sa asiasi ai foi le No Cash i le Aoga Loto Taumafai ma se foai o mea taumafa faapea se tinoitupe e silia ma le $1000 tala.
E iai foi le latou faigapaaga ma le Toomaga mo e Puapuagatia poo le SVSG, ma ua tele foi taimi e asiasi atu ai ma momoli fesoasoani mo Siliniu Lina Chang ma le fanau o loo aumau ai lea foi nofoaga.
O le kalapu a le No Cash na amata faavaeina mai le tausaga 2019, ma ua silia ma le 30 ona sui auai. E suisui atu lava le laulau faafoe i lea tausaga ma lea tausaga aua le taitaia o a latou galuega fai. O le laulau o loo tautuaina le kalapu i le taimi nei o – Mautofu Mamona (Peresetene), Solomua Manu (Sui Peresetene), Roger (Failautisi), Lusila (Sui Failautusi), Ivan (Teutupe), Brian (Faatamā) ma Ati Ulugia (Sooupu).
(0)
