E valu tagi e faasaga i se tasi o matai Samoa o loo faamautu i totonu o Niu Sila e aofia ai ma le tagi a le taitai o le vaega faaupufai o le HRPP e faasaga i lē ua lauiloa i luga o upega tafailagi, Tama o le Eleele.
O tagi nei e valu e pei ona faamaonia mai e le Komesina o Leoleo, na faaulu atu e le mamalu o le atunuu, e faasaga ia Fiu Faumuina Sikuka Lomitusi, e aofia ai ma le tagi a le susuga ia Tuilaepa Sailele Malielegaoi, le taitai o le vaega faaupufai e Puipuia Aua Tatau a Tagata.
Saunoa le Komesina o le Matagaluega Leoleo Falepuipui ma le Ola toe Fuataina le tofā ia Auapaau Logoitino Filipo, o tagi na faaulu atu e tagata taitoatasi, o i latou e faapea ua aafia o latou tamaliiaga ma le tauleleia o latou igoa, ona o faasalalauga i se polokalame a Fiu o loo tuuina atu i luga o le social media ae na ta’ua ai o latou igoa.”
O Fiu e faamautu i Niu Sila, peitai, na malaga mai i Samoa ona o fuafuaga faaleaiga.
O sana faasalalauga tuu sao mai Savaii ina ua taunuu mai i Samoa nei, lea na mautinoa ai e i latou sa faaulu a latou tagi, ua i Samoa nei. Ma maua ai loa le avanoa e faataunuu ai moliaga faasaga ia te ia.
O loo molia Fiu i moliaga o le faia o faamatalaga tau faaleaga, (defamation) lafo upu faifai (insulting words) faaaogaina upega faatekonolosi e faataunuu ai gaioiga faasoesa (harassment) ma nisi moliaga faaopoopo e ono iai.
O loo tatala i tua Fiu i aiaiga masani o le taofia lea o lona tusifolau i le Ofisa o le Resitala o le Faamasinoga, ma le saini faalua i le ofisa o leoleo i vaiaso taitasi. E tapu fo’i ona toe agai i luga o le social media e toe faia ni faasalalauga e aafia ai nisi.
Na faamanino mai fo’i e Auapaau, “O tagi e faasaga ia Fiu o tagi na faaulu atu e le mamalu o le atunuu sa aafia, ae le o ni tagi a vaega faaupufai.”
O le Tama o le Eleele e silia ma le 31,000 i latou o loo mulimulita’ia ana faasalalauga poo ana followers i luga o le Facebook.
Sa tuuina mai fo’i sana faasalalauga i le asō e taulogologo mai ai mo le silafia o ana followers, o loo manuia o ia ma o le a talia ma le fiafia fo’i pe afai e iai nisi e fia fesoasoani atu mo lana case.
O le tasi lenei o solitulafono ua tulaga ese le toatele o tagata o loo aafia ai – o le faia lea o faasalauga e osofai pe faaleagaina ai le tamaliiaga ool se isi tagata.
O le tausaga 2019 na tuuina mai ai e le Faamasinoga Faaitumalo se faasalaga e 7 vaiaso i le toese ia Malele Paulo poo King Faipopo, ina ua faamaonia ona moliaga o le faaleaga o le tamaliiaga o le Susuga ia Tuilaepa Sailele Malielegaoi.
Na faasalalau e Malele Paulo i luga o sana live i le Facebook – o Tuilaepa sa taupulepule e faaoo le oti i le afioga ia Levaula Kamu, ma sa ia aumaia se container faga poo laau malosi i totonu o le atunuu.
O le Aso 22 o Iulai o le a toe tulai ai Fiu i lguma o le faamasinoga.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
