Faamaonia Moliaga o Gafa Siona i le Maliu o se Tamaitai Saina Faipisinisi

O Gafa Siona Faamausili Tauafao, mai le afioaga o Malie o se tasi ua molia faafia i soligatulafono tau fualaau faasaina..

0
3960
Gafa Siona Faamausili Tauafao.

Ua faamaonia e le Faamasinoga Maualuga moliaga o se alii sa ia faafoeina le taavale na mafua ai ona maliu se tamaitai Saina faipisinisi le vavevao o le Aso Sa 24 Setema 2023.

O Gafa Siona Faamausili Tauafao, mai le afioaga o Malie, 39 tausaga, o se tasi sa molia fo’i i soligatulafono tau fualaau faasaina.

E ui sa ia teena moliaga faasaga ia te ia, ae ua faamaonia foi e le Faamasinoga lona tauaveina lea o se taavale e le’i pasiaina faatulafono; faaoea lona lē tu (failed to stop) i le taimi na tupu ai le faalavelave.

I le fofogaina o le faaiuga e le afioga ia Leiataualesa Daryl Clark i le vaiaso nei, sa tā’ua ai e le Faamasino, o se faalavelave sa tatau lava ona lē tula’i mai.

Saunoa Leiataualesa, “E telē se avanoa sa tatau ai ona lē tupu le faalavelave, e ala lea i le faalemu o lou sā i le taimi na e vaaia ai le tamaitai o ia kolosia le alatele, atoa ai ma lou tausisi lea le itu auala po le laina na e pasia ai le isi taavale.”

Faailoa e le Faamasino, ua faamalieina le Faamasinoga i molimau sa folasia i le taimi na suesueina ai lenei mataupu.

“Ua lava lea e faamaonia ai e le Faamasinoga moliaga, e aunoa ma se masalosaloga (beyond reasonable doubt).

O se tasi o molimau sa ia tā’ua ai, o ia sa faatau i’a i le taeao pō o le Aso Sa, i autafa tonu lava o le auala sa tupu ai le faalavelave.

Sa ia iloa atu se van na sau ma tu mai i le isi itu auala. Sa oso mai i fafo le tamaitai Saina lea sa aafia, ma kolosi mai le auala aua e masani lava ona sau e faatau i’a.

Peitai, o le taimi tonu lena, o loo agai mai ai le tuuga taavale e agai mai Sisifo ma aga’i atu i Apia.

“O le taxi ma le Hyundai Getz o loo mili mai ai.”

O le molimau a Williams, o le taimi tonu na pāsia ai e le Getz le taxi, na lavea ai ma le tamaita’i Saina.

Sa faailoa e le molimau, o ia na muamua taunu’u i le tamaita’i sa lelea mai autafa o le auala pe ā ma le 15 mita, ma o ia foi na vaai tino lava i le faalavelave na tupu.

 

Sa faaauau pea le miliga a nei taavale e lua, e le’i tu se taavale i le taimi na lavea ai le tamaita’i Saina.

O Gafa Siona, sa lipotia e le Samoa Global News le tatala ai o ia i tua (bail) ia Fepuari 2022, ina ua molia mai se osofaiga tau fualaau faasaina a leoleo i Vaitele-Fou iā Tesema 2021.

E lau le iuga i le vaiaso nei o loo tatala fo’i i tua Gafa Siona. Ae ina ua faamaonia moliaga nei, sa tuuina mai ai loa se poloaiga a le Faamasinoga e taofia ai lenei alii e tālia ai le lauina o se faasalaga i le Aso 25 o Iulai.


Brisin Manu Retzlaff-Lima