Tuualalo Tuilaepa e Faamuta Loa lea Mataupu ae Ave le Faamuamua i le Tau o le Soifuaga

0
6350

Ua faailoa se finagalo a le taitai o le Itu Agai le afioga ia Tuilaepa Sailele Malielegaoi, ua lava loa lea ae agai loa i luma e galuega auā se manuia lautele o Samoa.

I se faatalanoaga ma Tuilaepa ina ua tuuina mai le faaiuga a le Faamasinoga Toe Iloilo e faaleaogaina ai le faamalolo lē tumau o i la’ua ma le failautusi a le HRPP ia Lealailepule Rimoni Aiafi, na ia tuuina mai ai se tuualalo i le afioga i le Fofoga Fetalai.

“Ua tatau loa ona saga’i ane e faatino tiute a le fofoga fetalai ae matou lagolagosua atu.”

“O la’u tuualalo, e lelei ona saga’i ane loa e ave le faamuamua e saili se vai fofo i le tau o le soifuaga, aemaise le alo atu o Samoa e talimalo i le fonotaga a taitai o Malo o le Taupulega, ae tuu ia loa nei vevesi i le faapolokiki.”

O le tuuina mai o le faaiuga a le faamasinoga apili, ua teena ai le talosaga a le afioga le Fofoga Fetalai Papalii Oloipola Taeu Masepau, ma faamanino mai ai, e lē lava le malosiaga o Tulafono Faavae a le Palemene e faamalolo ai sui faipule e pei ona iai le faaiuga i le sui o Lepa ma Faleata 4 mo le lua tausaga.

Sa tuuina mai se folasaga faalauaitele a le Fofoga o le Maota, e tumau pea le malosiaga oi le Palemene a Samoa e iloilo ai Uiga le Migao a se Sui Usufono.

“Ae ua finagalo ma faamautu mai e le Faamasinoga Toe Iloilo ina ia aiaia le faaaogaina o ia malosiaga e ala i se Tulafono a le Palemene..”

Ua faamautu mai e le Fofoga Fetalai, ua iai se faamoemoe ua tatau ona ave le faamuamua i lenei mataupu ma tagofia i se taimi vave..”

Saunoa le Fofoga Fetalai, i le taimi nei ua amatalia le galuega o loo tapena ai le tulafono.

Ae o le finagalo lava ia o taitai a le Itu Agai, e lelei pe a tuu ese loa lea mataupu, ae saga’i loa i se fofo o le tau o le soifuaga.

“O lea ua toe siitia le tau o le penisini i le masina nei o Fepuari ma atili faaopopo ai foi lea ona siisii le tau o le soifuaga..”

Saunoa Tuilaepa o le isi tulaga e ao ona faamuamua o le tali malo ai o Samoa mo le Fonotaga a Taitai o Malo o le Taupulega (Commonwealth Heads of Government Meeting) poo le CHOGM.

“O se tapenaga e tatau ona tuu atoa iai le fai mea lelei o Samoa..

“E tatau ona tatou galulue faatasi e tapena Samoa mo lea taligamalo e omai uma ai taitai o Malo tetele i Samoa nei i le masina o Oketopa.”

O le maea ai o faigapalota o Aperila 2021 ua faaigoaina o le Samoa Political and Constitutional Crisis lea sa tulai mai ai vevesiga i le va o Vaega Faaupufai e lua.

E tolu lelei masina e le o nofo lelei le atunuu ae o faagasolo le mau faamasinoga e iloilo ai le Faavae o Samoa. O le Aso 23 o Iulai 2021 na faatoa mafai ai loa ona tulai mai le faigamalo fou ina ua tuuina mai se faaiuga a le Faamasinoga Toe Iloilo.