Tuuaia se Pule Aoga i lona Taumafai e Faatino se Faiaiga Faamalosi ma se Tasi o Faiaoga

0
11030
Deputy Police Commissioner Papalii Monalisa Tiai-Keti.

Ua molia e leoleo le puleaoga a se kolisi maualuga i Upolu, o loo tuuaia nei i lona faia o ni amioga matagā i se tasi o faiaoga tamaitai i le laumua lava e tasi.

Saunoa le Sui Komesina o Leoleo ia Papalii Monalisa Tiai-Keti, e lua moliaga o le taumafai e faatino se faiaiga faamalosi ma le moliaga o le faaoolima matagā ua tuuaia ai lenei pule aoga.

Saunoa Papalii, e 50 tausaga le matua o le pule a’oga o loo aafia i lenei mataupu.

O le masina o Tesema 2023, i se fiafia sa faia e faaiu ai galuega faaleaoaoga o le tausaga, lea sa tulai mai ai le faalavelave.

Sa lipotia atu lenei mataupu i le ofisa o leoleo ma faasolo ai loa suesuega.

O loo tatala i tua lē ua molia i aiaiga masani e pei o le taofia o lona tusifolau, saini i le ofisa o leoleo i vaiaso taitasi, ma le faasā ona toe taumafai e faafesootai lē o loo aafia.

O le Aso 6 o Fepuari o le a tulai ai i luma on le Faamasinoga Maualuga lenei alii puleaoga e tali atu i ona moliaga.