E le’i maua lava se alii talavou sa sa’e le latou vaa i taga palolo

"O le atalii ia Toetu Aoena, sa faamoemoe e malaga atu i galuega faavaitaimi i le masina nei."

0
2555

O loo sailia pea se alii talavou, 22 tausaga  sa agai e ta palolo i le po o le Aso Faraile 6 Oketopa a malama le vaveao o le Aso Toanai, peitai e le’i maua lava o ia.

O le atalii ia Toetu Aoena, ua maea ona tapena le faamoemoe e malaga atu ai i galuega faavaitaimi i Ausetalia i le masina nei lava.

Sa faamaonia mai e se sui o le afioaga o Poutasi le tofa ia Si’a Tagataese, e toaono ni alii sa agai e ta palolo.

“Ae sa faaletonu le vaa sa latou faaaogaina, ina ua sa’e, o eseese loa ua alu lava le tagata ia..”

Tā’ua e Si’a, sa mafai ona maua se vaega o le sami papa’u e le isi toalima, ma laveaina ai i latou, peitai, o le talavou 22 tausaga e le’i mafai ona toe iloa i lea po lona tino.”

O le taeao na sosoo ai na taumafai atu ai le vaega laveai a le Matagaluega o Leoleo faapea ma le Pulega o Fuimu ma Faalavelave Tutupu Faafuasei (FESA). Peitai, e le’i manuia.

Sa toe agai fo’i fesoasoani muamua (emergency response) a le FESA ma Leoleo e sue le ogasami i gatai o Aleipata ma faasolo mai ai i Falealili, peitai e oo atu lava i le taimi o lenei tusiga, e le’i manuia lava.