Siitia soligātulafono lipotia mai i le vaitau o aso fiafia

0
272

Ua faamauina e le matagaluega o leoleo le siitia o le numera o soligatulafono na aafia ai le atunuu i le vaitau o aso fiafia.

Ua siitia le numera o soligatulafono na aafia ai le atunuu i le vaitau o aso fiafia na te’a atu nei 2023/24 pe a faatusatusa atu i aso fiafia o le tausaga talu ai.

O le saunoaga lea a le Komesina o le Matagaluega o Leoleo ma Falepuipui, le afioga iā Auapaau Logoitino Filipo.

Saunoa-Auapaau, “Na faamauina tulaga o mataupu na valaau mai ai le atunuu mo se fesoasoani i vaitau o aso fiafia e 463,  faatusatusa atu i le 388 na faamauina i le vaitau aso fiafia o le tausaga 2022..”

O mataupu i sauaga i totonu o aiga e 44 na faamauina, e faatusatusa atu i le vaitau o aso fiafia 2022 lea na faamauina ai le aofai o mataupu tau sauaga i totonu o aiga e 28.

“O tulaga i taavale afi e 68% na faamauina i le vaitau o aso fiafia na sei mavae atu nei, pe a faatusatusa atu foi i le 65% na faamauina i le vaitau o aso fiafia 2022..”

Saunoa Auapaau, “E pito sili ona toatele ē na aafia i le soligatulafono o le faaoolima, faatusa atu i isi solitulafono na lipotia mai ma faapena foi ona tali atu iai le matagaluega.”

Sa toatele foi le mamalu o le atunuu na taofia mai poloka sa faatinoina mo le ave taavale ao faasuaava, faapea ma raid a leoleo sa fai ina ia faaitiitia ai fualaau faasaina i lea vaitau o le tumutumu mai o mālō mai fafo.

O vaitau o aso fiafia e le’i mafai ona mālōlō le matagaluega. Sa fa’aauau pea ona galulue faasoloatoa Malu o le Malo mo le puipuiga o le saogalemu o le atunuu.