“Pau le tala a leoleo, ua faigata le matou galuega”

"Pau le tala na tali mai ai leoleo, 'Ua faigata le matou galuega.""

0
453

“E faafefea na ou alu e faaulu lau tagi i le Ofisa o Leoleo, ao lea na maligi le toto o lo’u atali’i, toe fa’aleaga lo’u fale, ao lae tutu leoleo e aunoa ma se gaioiga na fai.”

O le finagalo lea o le tina ia Limaila Simone, mai le afioaga o Leauvaa.

Saunoa Limaila, o ia ma lana fanau sa vaai atu i le faalavelave na tupu mai i le isi itu ala. “O le mago na tuu i lalo e taulelea o le afioaga o Afega, ae na palasi le mago i luga o le fale ao iai tamaiti i totonu i lea taimi, lea na mafua ai ona tali ifo se tasi o alii.”

O le laau sa pa’u i luga o le fale sa mafua ai ona toatamai se tasi o Alii talavou.

Ta’ua e le tina, o le kolosi mai o i latou i le isi itu o le auala lea na mafua ai ona fasi sese lona atalii ina ua le maua le talavou na tali ifo.

O ia sa i totonu o lona fale, faatasi ma lana fanau iti, lima tausaga ma le tolu tausaga, ae ua ia te’i i lona faalogoina o le pa’o o maa o lona fale.

Na savali mai i fafo pe aisea ua aafia ai fua lona fale ae faateia o ia i lona vaai atu i lona atalii o Maranata, ua sau le palapala (toto) mai lona ulu ma ona foliga.

Sa oso mai lona popole i lona vaai atu o loo taumafai le toalua o Maranata e pupuni ma laveai Maranata i lea taimi, ae o lea taimi o loo sii lava e le fafine lana pepe, e na o le tasi le masina.

“Na ou faiatu i leoleo i lea taimi, “a tou tutü ma matamata ae le fai se tou galuega?..”

“Na mafua na tou omai o le tausi o le filemu, ao lea e fai nei faiga e aunoa ma se tou gaigoiga o fai?..”

“Sa ou fai iai, poo le mea ea na tou omai e faasa ona tali atu se isi ia Afega ae faataga e outou tagata Afega e fai le faaoolima ma le solitulafono?”

Saunoa Limaila, “Pau le tala na tali mai ai leoleo, “Ua faigata le matou galuega.”

O le manatu o Limaila, “Afai ua leai se galuega a leoleo sa fai i lea taimi, sa tatau ona omai leoleo e ave si ana tama i le falemai.

O le tala a le uso matua o Maranata, sa tuu ane e se tasi alii leoleo le $25 tala e ave ai lona uso i le falemai.

Saunoa le tina, “E ui ina matuitui ma tiga, i le vaavaai atu i nei faiga faasausili ma le aafia fua foaga ae lei faimisa, ae ua manatu, o le a faamagalo, o le a leai lava se tagi e faaulu, ae o le a tuu i luma o Le Atua, o ia o le faamasino tonu, na te taui mea uma.”

O le tina ia Limaila e toafa le fanau, toatolu tama ae toatasi le tamaitai. O le tausaga 2012 na maliu ai le tama o le aiga ae tuua ai nao ia ma le fanau. E iai aafiaga o le soifua e pei o gasegase o le tino o loo aafia ai.