Molia se Tamā 50 Tausaga i le Fasioti Tagata Faamoemoeina i Feeseeseaiga tau Fanua

"Na amata i tau'aigā ma'a seia oo lava ina  faaaoga ai laau malosi."

0
2614

19 Iuni 2024 Savaii Samoa. E 50 tausaga o se tamā mai le afioaga i Fagafau i Savaii ua molia e leoleo ma tuuaia i le maliu ai o se tamā mai le afioga o Samata-i-Tai.

O lenei faalavelave na tulai mai i le Aso Sa 16 Iuni 2024, ina ua vevesi afioga i luga o tuāoi ma fanua.

O se feeseeseaiga i le va o Fagafau ma Samata-Tai lea e pei ona faamaonia mai e le Komesina o le Matagaluega o Leoleo ia Auapaau Logoitino Filipo.

Police Commissioner Auapaau Logoitino Filipo.

Saunoa Auapaau, “O se vevesi na tulai mai i le Aso Faraile, i le va o le afioaga nei e tuāoi, o Fagafau ma Samata-i-Tai, i tulaga tau fanua, ae na toe alia’e mai i le po o le Aso Sa..”

“Na amata i tau’aigā ma’a seia oo lava ina  faaaoga ai laau malosi.”

O loo molimau nisi o afioaga, o se pasi na tau’ai i maa, ma vevesi mai ai lava le Aso Faraile, ma faateteleina ai lava i le Aso Sa.

Saunoa Auapaau, e ono iai ni moliaga faaopoopo, ma o loo faaauau pea suesuega a leoleo i Tuasivi i lea faalavelave.

O loo tuuina mai fo’i se fautuaga a le Komesina o Leoleo mo afioga uma e lua, ina ia tuu atu pea le mataupu i luma o leoleo aua le tausiga o le saogalemu, ma aua ai nei toe maumau se soifua.

Visit our SOS stores at Togafuafua and Salelologa.

 

Ua tuuina mai fo’i se faamaisega a lana afioga i le Komesina, mo le aiga faavauvau i le toesea o se tama e pele i aiga.

O le Aso 8 o Iulai o le a tulai ai le tamā 50 tausaga mai le afioaga o Fagafau e tali i moliaga o le fasioti tagata faamoemoeina.