Maua e leoleo se ave pasi o loo uumia ni fualaau faasaina i se tamai ato

"Sa maua ai i se tama'i ato sa ia tauaveina ni fualaau fa'asaina o le marijuana fa'atasi ai ma ni tagapepa iila laiti o loo iai totonu ni pauta e foliga mai o le aisa". 

0
2564

E 30 tausaga o se alii ave pasi mai le afioaga o Salelavalu, o loo taofia nei e leoleo i Tuasivi.

E pei ona tuuina mai i se pepa o faamatalaga mai le Matagaluega o Leoleo, o se valaau ane o se tasi o le mamalu o le atunuu, na lipotia ai se ave pasi o loo masalomia lona ia faatauina fualaau faasaina i taimi o faigamalaga.

“O lenei lipoti sa logoina ai le Ofisa o Leoleo i Tuasivi ma taofia ai le pasi ma sailia ai le alii avepasi…

“Sa maua ai i se tama’i ato sa ia tauaveina ni fualaau fa’asaina o le marijuana fa’atasi ai ma ni tagapepa iila laiti o loo iai totonu ni pauta e foliga mai o le aisa”.

Na momoli le fa’afetai a le matagaluega i le mamalu o le atunuu o loo lagolagoina le galulue fa’atasi e tafiesea aafiaga o fualaau fa’asaina i tupulaga talavou.

“E leai se lumanai manuia pe a fa’amoemoe i fualaau fa’asaina.”

“Tatou tutu fa’atasi e tafiesea lenei mala mai isi o tatou atunuu”.

O loo faasilasila mai fo’i e leoleo, ae i iloa pe ete mautinoa foi ni fa’amatalaga iā i latou o loo fiafia i lenei taleni o le fa’atauina atu poo le fa’aaogaina foi o fualaau fa’asaina, valaau ane le Ofisa o Leoleo i le numera 22222.

E le’i faamautu mai i lea Pepa o Faamatalaga mai le matagaluega poo le a le aofai o fualaau faasaina poo le mamafa foi o le aisa poo le pauta o le methamphetamine o loo masalomia.

Ua faatuputupulaia pea le tele o mataupu tau fualaau faasaina o loo lipotia ma molia ai le toatele i totonu o Samoa.

O se faamatalaga a le Matagaluega, e le o iai ni faamaumauga o loo gaosiaina i totonu o Samoa le fualaau faasaina o le aisa lea ua taatele i totonu o Samoa. Lea ua oo lava i nofoaga faitele, o maketi ma pasi e femalagai ai le atunuu.  fo’i ona maua taatele i totonu o le atunuu.

Afai e lē o gaosiaina le fualaau faasaina o le aisa i totonu o Samoa, o lona uiga o loo aumaia i totonu o le atunuu, ma aafia ai le puipuiga lelei o tatou tuaoi (borders).

Faasalalauga Tāua – from SGN Public Notice Board: