Toe Apili e le Loia Sili le Sala Tupe $3000 mo le Aumaia o Fualaau Faasaina i Totonu o le Atunuu

0
1344

Ua tuuina atu se talosaga apili a le Ofisa o le Loia Sili e tetee atu ai i se faaiuga a le Faamasinoga Faaitumalo, lea sa faasala tupe ai Peseta Sefululua Pueleo ina ua  faamaonia ona moliaga o le aumaia lea o oloa faasaina i totonu o le atunuu.

Sa toe tulai Peseta i luma o le Faamasinoga Maualuga i le amataga o le vaiaso nei, ina ua tuuina atu le talosaga apili a le Loia Sili, e faaleaogaina ai se sala tupe e $3,000 tala na tuuina mai e le Alii Faamasino iā Loau Donald Kerslake ia Fepuari 2024.

O Peseta sa avea ma tagata faigaluega o le Ofisa o Tiute i le taimi na faatuatusi mai ai i lona igoa se faamomoli, sa faagāgā mai ai fualaau faasaina o le aisa e 900 kalama sa maua atu e leoleo i totonu o ni pusa cereal mai Amerika.

900 grams in total, packed separately into 2 cereal boxes confiscated by Police and Customs in a joint operation.

I le valaauina o lenei mataupu i luma o lana afioga iā Leiataualesa Daryl Clark i le vaiaso nei, sa fofogaina ai le talosaga a le Ofisa o le Loia Sili, ina ia toe iloilo le faasalaga sa tuuina mai e le faamasino ia Loau Donald Kerslake.

O le silasila a le Ofisa o le Loia Sili, ua lape le Alii Faamasino ia Loau, i lona le amanaiaina o le aofai o fualaau faasāina e tusa ma le 900 kalama le mamafa sa molia ai Peseta, ma ua lē talafeagai ai le sala tupe $3,000 na tuuina mai.

O loo finauina e le Ofisa o le Loia Sili, e tusa ma le 6 tausaga e tatau ona nofosala ai i le falepuipui le alii o Peseta pe a fua i le matuiā o moliaga e lua sa faamaoniaina, i lona aumaia lea o fualaau faasaina i totonu o Samoa.

I le manatu o le Loia Sili e tauala mai le tamaitai Loia iā Fuifui Ioane, ua faamamafa i le Alii Faamasino le tetee a Peseta, na te leiloaina lea tagata sa aumai ai le faamomoli ma e faateia o ia i le aumai o ia pusa i lona igoa.

Methamphetamine and quality grade cannabis found in cereal boxes imported from USA.

O le faavae tonu lena o le faaiuga a le Faamasinoga Faaitumalo, ina ua taliaina lenā mau e faapea ai – e le’i iloa e Peseta se mea e tasi i le faamomoli.

O le agaga tonu lena o le tetee a le Ofisa o le Loia Sili ma talosaga ai e faaleaogaina le faaiuga a le Faamasinoga Faaitumalo, ae toe iloilo se sala talafeagai, ona sa faamaonia moliaga e lua faasaga ia Peseta, o le aumaia o oloa faasaina i totonu o Samoa.

E lua vaiaso ua tuuina atu i le loia a Peseta e tuuina mai ai se tali i le talosaga apili.