Ioeina e se Tamaitiiti Aoga 19 Tausaga Moliaga e Tolu o le Faiaiga Faamalosi

"O lea teineititi sa malaga mai atunuu mamao, e tafafao mai i Samoa ma lona aiga i le vaitau o aso fiafia..

0
2218

Aso Gafua 26 Fepuari 2024, Mulinuu, Apia Samoa. O le taeao nei na tula’i ai se tamaitiiti aoga 19 tausaga i luma o le Faamasinoga Maualuga, ma ia ioeina ni moliaga se tolu o le faiaiga faamalosi.

O le lua vaiaso talu ai na mua’i tulai ai lenei tamaitiiti ma faatonuina ai le tuuina atu o se taimi e sailia ai sana loia.

O le alii loia ia Faimalomatumua Mathew Lemisio sa tula’i mo lea alii talavou, ma tuuina mai le tali o le ioeina o nei moliaga e tolu.

I taualumaga o le faasologa o soligatulafono (criminal call-overs) sa ta’ua ai e le itu a leoleo, o se teineitiiti 16 tausaga sa faauluina le tagi. O lea teineititi na malaga mai atunuu mamao, e tafafao mai i Samoa ma longa aiga i le vaitau o aso fiafia.

O le amataga o Ianuari o le tausaga nei na tula’i mai ai lenei faalavelave. O loo iai le poloaiga a le Faamasinoga, e faasa ai ona faasalalauina le igoa o le sa aafia, faapea foi ma le o loo molia. O lenei tapu e aofia ai ma le igoa o le aoga o loo aoga ai le tamaitiiti.

O le Aso 12 o Aperila o le a tuuina mai ai e le Faamasinoga le faasalaga mo lea alii ua ia taliaina ona moliaga.

E pei ona ta’ua e le Alii Faamasino ia Fepuleai Ameperosa Roma, o le aso lea o le a folasia ai se talosaga faatauanau a le loia a lea alii talavou, faapea foi ma talosaga masani a leoleo mo se faasalaga amata, ae maise o se lipoti mai le ofisa nofo vaavaia.

“O le a fofogaina ai foi le faaiuga a le Faamasinoga mo se faasalaga…”

O loo tatala i tua le o loo molia i aiaiga masani a le Faamasinoga, e saini faalua ai i le vaiaso.

Faasalalauga Tāua 

Avanoa Faigaluega 

Faasalalauga Tāua 

Call 8422770 and ask for Tapusoa Senele.