Fesiligia le amiotonu o faatonuga a faiaoga ua poloa’i ai fanau aoga e avatu meaalofa mo le Aso o Tina

"Fai mai e tautuana le meaalofa mo le aso o tinā aua o ia foi o le isi tinā.. ae fai mai ou te manaomia le meaalofa tupe."

0
4350

Ua fesiligia e se tasi tamā le amiotonu o faatonuga a faiaoga ua poloa’i ai i le fanau aoga, e avatu meaalofa mo latou mo le Aso o Tinā.

O lagona le mautonu lea a se tasi o tamā e toatolu lana fanau na oo atu i le vaiaso na te’a nei, ma poloaiga a faiaoga e faapea – o le Aso Faraile e tatau ai ona o atu i le aoga ma meaalofa mo le Aso o Tina.

E le’i manao si tamā e faailoa lona suafa ona o le puipuiga i le fanau. “Nei aafia si a’u fanau pe fai fo’i se faaiuga e tuli ai le fanau mai le aoga.”

Ae sa ia fia faasoa mai lona faafitauli, ona e toatolu le fanau aoga a lenei tamā, sa toe vevesi ai e aitalafu se tupe e tapena ai meaalofa mo faiaoga, ma tuuina atu i le fanau e o ma latou i le Aso Faraile na te’a nei.

O le alii matua i le Year 11 sa faailoa ane, ua poloai mai le faiaoga, o le meaaalofa tupe e na te moomia.

 

“Fai mai e tautuana le meaalofa mo le aso o tinā aua o ia foi o le isi tinā.. ae fai mai ou te manaomia le meaalofa tupe.”

Sa tapena e lenei tamā le $20 tala e alu ma lona atalii matua, ae sa faapena fo’i se manaoga na omai ma le fanau laiti.

E eseese uma aoga e iai le fanau a lea tamā. O le isi e i le Year 8 ma le isi e Year 9. E tutusa lava poloaiga na avane i vasega eseese nei e lua. Ia tautuana se meaalofa mo le aso o tina, ma e tatau ona tofu atu le tamaitiiti ma le meaalofa.

E ui ina lē mautonu le tamā ona e le’i fuafua iai lana paketi o lenei vaiaso, ae maise o tapenaga uma fo’i a si ona aiga mo le aso faapitoa o tina, ae peitai, sa ia tā’ua, e lē mafai ona tuua ona o au o matua fanau.

“Ua viga mai nei le fanau, e lē mananao e nā o latou o le vasega e lē tali atu i le poloaiga lea ua aumai, ma o le mea moni, e lē fia ō i le aoga pe a leai ni a latou meaalofa..”

“Sa ou manatu, o loo iai fo’i le aso faapitoa mo faiaoga, ma o le aso lena e ave ai meaalofa a le fanau mo latou faiaoga, ae o le aso lenei, o lea e tau sue se tupe e tapena ai meaalofa a a’u nei ma si a’u fanau mo le tinā o le aiga..”

Sa tapena se meaalofa afiafi a lona afafine o loo Year 8 ma se meaalofa afifi a lona atalii o loo i le Year 9. E ta’i $25 tala meaalofa nei e lua, ae o le atalii matua, sa tapena se teutusi ma tuu iai le $20 tala.

Sa tā’ua e lenei tamā, o lana galuega e $5.55 i le itula, ma e $200 lana tupe mama e maua i le vaiaso. Sa ia toe talosaga ma aitalafuina se tupe mai le fale faigaluega e tapena ai meaalofa mo faiaoga.

“O faaiuga o tausaga taitasi ao tapena atu le fanau aoga mo suega, e tele foi na sasao mai ai tapenaga mo taumafa e faatino atu e le fanau mo faiaoga o loo fai suega.”

Ae o le matau a le tamā, e lē o tuua lava faasalalauga o feau lapata’i mai a le Matagaluega o Aoga, ina ia taofia nei faiga, ae maise o tapenaga o loo tuuina atu e sao mai ai le fanau ma matua.

“E le o toe faigofie fo’i le tau o le soifuaga i lenei vaitau, ae o se faamamafa fo’i lea i matua le tuuina atu o meaalofa mo faiaoga.”