Falepuipui se tama matua i lona faia o ni gaioiga mataga i le afafine a lona atalii

"O le vaai a le Faamasinoga e ogaoga le solitulafono ona o le teineitiiti na aafia e iai ona manaoga faapitoa."

0
744

Ua faasala nei i le falepuipui se tama matua, 68 tausaga ina ua ia faia ni gaioiga mataga i le afafine o lona atalii.

E tolu tausaga ma le ono masina le faasalaga sa tuuina mai e le Faamasinoga Maualuga, ina ua faamaonia le faia lea o ni gaioiga tau feusuaiga i le afafine a lona atalii; e na o le sefululua tausaga le matua.

 

 

I taualumaga o lenei mataupu i luma o le faamasinoga e faapea o le aso tonu na faailogaina ai le Aso Sa o Tama i le tausaga 2022 na amata faatino ai e lea tama ana gaioiga i lona afafine (grand daughter).

E tolu moliaga na faamaonia i luma o le Faamasinoga Maualuga e aofia ai le mata’ifale (incest) faapea le lē faia lea o lona tiute o le vaaia lelei o lana fanau.

E to’alima molimau a le itu a leoleo e aofia ai ma le molimau a le teineitiiti na aafia. Sa molimau i luma o le faamasinoga ma loimata lenei afafine, e faamatala le mea na tupu ia te ia.

Na faailoa e lenei tama matua ua faasala lona teena o tuuaiga ma moliaga a le itu a leoleo. Sa ia faapea mai o se faufauga a lona atalii ma lona toalua lea ua fafau ai faamatalaga e faasaga ia te ia.

Peitai o le saunoaga le afioga i le Faamasino iā Fepuleai Ameperosa Roma..

“E ui ina e teena moliaga a le itu leoleo, peitai, ua lava molimau na tuu fofoga e faamaonia ai lou faia lea o gaioiga faasolitulafono, e faavae ai le faaiuga a le faamasinoga, aemaise o le vaai a le faamasinoga e ogaoga le solitulafono ona o le teineitiiti na aafia e iai ona manaoga faapitoa.”

O le tamā ua falepuipui nei sa galue o ia i se tasi o galuega maualuga a le Malo.

Ua faasa i se poloaiga a le faamasinoga ona faasalalauina (suppression order) le igoa o lē na aafia, faapea fo’i ma le igoa a lē o loo molia. E faasaina fo’i ona faasalalau le afioaga na tulai mai ai le soligatulafono.

Faasalalauga Faalauaitele