Falepuipui se faifeau i le ave taavale matautia ua oo ai le oti i se tasi

0
233
The Supreme Court - Mulinuu Courthouse.

E lua tausaga ma le tolu masina e nofo sala ai i Tanumalala se faafeagaiga Aso Fitu Tutoatasi, ina ua faamaonia moliaga o le ave taavale matautia ua oo ai le oti i se tasi (dangerous driving causing death).

E 67 tausaga o le faifeau ia Punivalu Alefaio Fotu.

I faamaumauga a le itu a leoleo, sa faailoa ai o lenei faalavelave na tulai mai i Tanumapua ia Me 2023, ina ua le mafai e Punivalu ona faatonutonuina le taavale sa malaga atu ai.

O le ituaiga Mistubishi sa ia faafoeina, ma ua saoasaoa tele, ma tifa ai i tua le taavale ma mafuli ai.

O se tamaitai aoga e 18 tausaga sa nofo i le pito i luma, na faanatinati atu i le falemai mo togafitiga, peitai, ua ogaoga tele manuaga sa aafia ai, ma maliu ai o ia.

I le fofogaina o le faaiuga a le Faamasino Sinia ia Vui Clarence Nelson na amata mai le faasalaga i le fa tausaga. E pei ona masani ai, sa toesea mai nisi tausaga ma masina ona o nisi o itu lelei.

Sa vave ioeina moliaga le itu a leoleo, ma o se taimi muamua fo’i lea ua tulai ai le faifeau i luma o le Faamasinoga.

Sa fofogaina foi e le faamasinoga nisi o gaioiga lelei sa faatinoina e masani ai le aganuu. Na totoe mai ai lea o le lua tausaga ma le tolu masina lea ua nofo sala ai i le falepuipui.

Na molimauina le faatumuina o le potu faamasino i ē sa lagolagoina le faifeau i Mulinuu. Sa auai Sui o le Ekalesia, aiga ma uo i le taimi na fofogaina ai le faaiuga.

“E selufu tausaga e mafai ona nofo sala ai se isi i le falepuipui mo le moliaga o le ave taavale ua mafua ai le maliu”.

O le saunoaga lea a le Faamasino Sinia ia Vui. “Peitai e mafai ona faaitiitia e mafua mai i ni tulaga lelei sa e faatinoina e ono faamalieina ai le faamasinɓoga.”

E tele foi mataupu faapea o loo suesueina i luma o le faamasinoga, o faalavelave tau taavale ua fano ai soifua, e faapea foi nisi mataupu faapea ua mae’a na tuuina mai faaiuga, ma o loo tuli ai faasalaga o i latou sa faafoeina taavale.

Faasalalauga Tāua mai le Samoa Business Hub:

 

Faasalalauga Tāua mai le Samoa Ports Authority:

Faasalalauga Tāua mai le UTOS

Faasalalauga Tāua mai le National Bank of Samoa