Faitioina e Tuilaepa le toe fo’i o Panoa e Taitaifono o le NPF

0
650

Ua faitioina e le taitai a le itu agai le afioga ia Tuilaepa Sailele Malielegaoi, le faaiuga a le kapeneta ua toe taliu ai le afioga ia Papalii Panoa Tavita Moala i lona tofiga Taitaifono o le Faalapotopotoga o Faaputugatupe mo Lumanai Manuia a le atunuu (SNPF).

Saunoa Tuilaepa, “Ou te ofo i le Palemia ma le Kapeneta i lenei faaiuga ua toe avatu ai Panoa i lona tulaga taitaifono..

“O le sese muamua lava lea na iai i le amataga, o le filifilia o Panoa. O le sese lona lua, o le toe filifilia o Panoa ae ua tutupu mea leaga ia, e foliga mai ua lua mea sese ae leai se mea sao..”

“O le upu moni sa tatau ona faamalolo Panoa ma lana komiti faafoe.”

“Ua ou alofa lava i le minisita i le taumafai lava e saili ni upu e ufiufi ai le faaiuga le talafeagai a le kapeneta.”

“O lea ua savalia e le pulega o le faalapotopotoga le ofisa o le minisita, o se tulaga o loo atagia mai ai o loo telē le faaletonu.”

O le vaiaso talu ai na faalauiloa ai e le Minisita o Tupe le afioga ia Lautimuia Uelese Afoa Vaai, le toe filifilia ai lea o Papalii e toe fo’i i lona tofiga Taitaifono o le NPF ma nisi o aiaiga na tuu atu iai e le Kapeneta.

E pei ona saunoa le Minisita o Tupe i se faatalanoaga ma Peseta Tusiga Taofiga, sa le’i faigofie le tōfā sa’ili mo se finagalo autasi o le Kapeneta e tusa o le matā’upu, e pei ona fesiligia ai le fa’atinoga o tiute o le Ta’ita’ifono o le S.N.P.F. iā Panoa Moala Tavita, po’o sosolo i luga o Faiga Fa’avae ma Tulafono ua mae’a fa’ata’oto a le Fa’alapotopotoga.

      Bringing you the excitement of Paris Summer Olympics!

Ui o lea, na fa’ailoa manino e le Minisitā o le Matāgaluega o Tupe iā Lautimuia Afoa Uelese Va’ai, i le mae’a o su’esu’ega fa’apitoa na nafa ma le Komiti sa iloiloina lea matā’upu, ma iloa ai e le’o a’afia lava se Tulafono i le fa’atinoga o tiute fa’aTa’ita’ifono a Panoa.

Saunoa le Minisitā o Tupe, ua toe fa’aa’e Panoa i lona tofiga, auā o ia o se tagata e matuā agava’a i le galuega, ma ua leva fo’i o tautua ai i le Fa’alapotopotoga i le tofiga o le Ofisa Sili o Pulega.

Peita’i, ua ‘ave ai ma aiaiga fa’apitoa a le Kapeneta, ina ia usita’ia ma taofia ai le ono toe tupu mai o lenei lava matā’upu i le lumana’i.

Fa’ailoa e Lautimuia, ua fautuaina fo’i e le afioga i le Palemia iā Fiame Naomi Mataafa ia Panoa, ina ia taofi le toe talanoa so’o i ala fa’asalalau ma tusitala, ma so’ona talatala ai matā’upu tupito a le Fa’alapotopotoga.

Saunoa Lautimuia, o su’esu’ega fa’alotoifale fo’i na faia e le Komiti Fa’atonu ma le Ofisa Sili o Pulega a le Fa’alapotopotoga aga’i i Sui o le Pulega na tusi atu iā te ia, ua toe fa’apafala. Ma e leai se a’afiaga o i latou nei i lea matā’upu pe o fuafua fo’i se fa’ai’uga e fai i ai.

O se tusi na saini ai le pulega a le SNPf ma tuuina atu le ofisa le minisita o loo faailoa ai lea tusi le fesiligia ai o gaigoiga o loo faatino Panoa pe o gatasi ma faiga faavae.

Saunoa le Minisita o Tupe, e tāua i le Kapeneta le fa’aleo o finagalo ma atugāluga o so’o se tagata faigaluega a le Mālō e tusa o matā’upu fa’apea, ma ia ‘aua ne’i taotaomia ona o le va’ai i ē mau tofi ae lē faia ai le mea tonu ma le sa’o.

Saunoa manino le Minisitā, e lē taofia le fa’aāli o manatu o le aufaigaluega ae tatau fo’i ona fai fuafua, ma ia iloa lelei le laina e vase ai le va fa’afeagai ma le isi uso ā faigaluega.

Ua tu’uina atu le fa’atonuga a le Kapeneta iā Panoa, o le Komiti Fa’atonu, Pulega ma le Aufaigaluega a le S.N.P.F. ina ia toe āuli ia mafolafola lelei a latou fa’afitauli, ma ia iloa le va fa’afeagai ai o le tasi i le isi.

E 67 miliona se tino i tupe sa faamatuu atu e le taitaifono i nisi o kamupani ma le au faipisinisi mo noagatupe. O lea gaioiga na fesiligia e le pulega a le SNPF faapea ma nisi o mataupu sa faamalolo le tumau ai le Taitaifono mai ona tiute ae faatino suesuega.

E lima vaega  o se polokalame faatalatalanoa a Panoa sa fai mai i luga o upega tafa’ilagi ma le Talamua Media. Sa tele mataupu faalotoifale o le SNPF sa faamatalatalaina e Panoa e pei o noagatupe ua le totogia, ma se tasi o kamupani Saina sa latou taumafai e tuuina atu se teutusi tupe (bribery money) i le Susuga i le Tamaitai Pule poo le afioga ia Lemalu Selesitina Meni-Reti.

O le susuga ia Panoa Tavita Moala sa avea ma Pule Sili o le SNPF  i le vaitau ao tula’i mai le faigamalo sa Palemia ai Tuilaepa Sailele Malielegaoi.