Faagasolo Molimau o le Mataupu a lē sa avea ma Loia Sili e Faasaga i le Palemia o Samoa

0
1921

Aso Lua 25 Iuni 2024, Apia Samoa. O le Aso Gafua o le vaiaso nei sa faasolo ai taualumaga o le Faamasinoga Maualuga i le suesueina o le tagi a le sa avea ma Loia Sili o Samoa, le afioga ia Savalenoa Mareva Betham-Annandale e faasaga i se faaiuga a le Palemia o Samoa, afioga Fiame Dr Naomi Mataafa, lea na faamuta ai lana auaunaga.

O Savalenoa Mareva Betham-Annandale sa tofiaina e fai ma loia sili o Samoa ia Iulai 2020. Peitai, o le masina o Setema 2021 sa talosagaina ai e le Palemia le Ao Mamalu o le Malo, e toe aveese mai le tofi Loia Sili ona o mafuaaga sa tuuina mai e le Palemia i se pepa o faamatalaga mo le atunuu.

Ina ua faatula’i ese Savalenoa mai le tofi, sa ia tuuina atu ai loa se tagi i luma o le Faamasinoga Maualuga, ina ia totogi mai le $650k afe tala.

 

O se Alii Faamasino mai Niu Sila o loo faafoeina taualumaga o le Faamasinoga. O le Kings Counsel (KC) ia Dr Rodney Harrison ma Fuimaono Sefo Ainuu, o loo tulai mo Savalenoa Mareva Betham. Ae mo le Palemia o Samoa, o loo tulai ai Taulapapa Brenda Heather-Latu ma le KC ia Benjamin Keith.

Sa tulaí Savalenoa ma tuuina atu sana molimau i luma o le Faamasinoga Maualuga. Sa ia tuuina atu i luma o le Faamasinoga ni faamatalaga e lagolagoina ai lana tagi – e leai se mafuaaga tatau na faatula’i ese ai o ia mai le tofiga Loia Sili.

Sa saunoa foi Savalenoa, ua tele le aafiaga o ia ma lona aiga, i le itu tau seleni ina ua faamuta lana konekarate. Ua iu ai lava ina siitia lo la aiga i atunuu e fafo e tauave ai galuega, ona ua faafaigata lava ona faaauau le pisinisi Ofisa Loia i Samoa nei.

Sa tula’i foi le Palemia o Samoa, e tetee atu ma auiliili faamatalaga i mafuaaga na fai ai lana faaiuga.

Sa ia tali atu i fesili a Dr Harrison o loo tulaí mo le Itu Tagi, poo a tonu mafuaaga sa faavae ai lona talitonuga e tuuin atu lana tusi e faamuta ai le konekarate a Savalenoa?

Sa tete’e atu le afioga ia Fiame Dr Naomi Mataafa, i tuua’iga ua faasaga atu ia te ia i lona tulaga o le Ta’ita’i o le Malo ma le fa’aiuga na faamuta ai le avea o Savalenoa ma Loia Sili a le Malo.

Saunoa Fiame, “Sa faavae lo’u talitonuga i le lē faataunuuina o le faatinoina o tiute a le Loia Sili o loo tula’i mo le Malo. Sa le finau o ia (silent) i itu taua sa tatau lava ona ia faasa’oina ma finauina, ae maise o le taimi sa sousou ai le vasa i vesiga na feagai ma le atunuu (political and constitutional crisis).

O le isi itu sa agai iai le tali a Fiame, o le fautuaina lea e Savalenoa e le Ofisa o Faigapalota e sui le numera o tina i totonu o le Palemene mai le lima agai le ono, ao talia e le atunuu le tuufaatasia o le Palemene ina ua maea le Faigapalota Tele o Aperila 2021.

O le isi itu na saunoa iai le Palemia, o le taimi sa faasalalau ai se finagalo o le Ao le Malo, o le a toe fo’i le atunuu e toe faatino le Faigapalota (snap elections). O lea faasalalauga, na mafua mai i se fautuaga a Savalenoa ao ia tauaveina le tofi o le Loia Sili mo Samoa.

Lagolagoina e le Digicel le Poloketi faaleleia o Papase’ea Sliding Rocks.

E lua aso o le a faagasolo ai le suesueina o lenei mataupu, ma o loo faafoeina uma taualumaga o le Faamasinoga i le gagana faaperetania, ona o loo fofogaina i luma o se Faamasino mai Niu Sila.

Na molimauina le auai ai o uo ma aiga faapea sui o le vaega faaupufai e Puipuia Aia Tatau a Tagata le HRPP e lagolagoina Savalenoa, ae sa faapena foi ona auai ai Minisita o le Kepeneta e molimauina ma lagolagoina le Taitai o le Malo ao tuuina atu lana molimau.