E lua ni faalavelave tau taavale sa tula’i mai i Samoa nei i le faaiuga o le vaiaso talu ai, ma toalua ai fo’i nisi sa fano ma maimau ai soifua.
Sa faamaonia mai e le Komesina o le Matagaluega o Leoleo ma Falepuipui le tofa ia Auapaau Logoitino Filipo, le ogaoga o le maliliu ai o nisi i ni faalavelave tau taavale i totonu o nai aso.

E 25 tausaga se alii talavou na so’a e se taavale, ae 37 tausaga se tama na maliu ina ua lavea se taavale sa malaga mai ai.
Saunoa Auapaau, o le Aso Sa 29 Setema sa maliu ai se alii talavou 25 tausaga i se faalavelave na tula’i mai i Fasitoo-Uta.
Sa faanatinati atu i le falemai tele i Motootua lenei alii mo togafitiga, peitai, na le mafai ona faasaoina lona soifua, ma i’u ai lava na maliu.
“O le tulaga tugā o manuaga mai le faalavelave sa maliu ai lenei alii talavou.”
Saunoa Auapaau, e le’i tū le avetaavale ile taimi o le faalavelave, ae sa mafai ona maua e leoleo le ave taavale o lea faalavelave mai faamatalaga a molimau.

“Ua molia o ia i le ave taavale matautia ua mafua ai le maliu, ma le faafoeina o se taavale e aunoa ma se laisene, faapea lona lē tu i le taimi na tupu ai le faalavelave.”
I se isi fo’i faalavelave tautaavale na tula’i mai i Luatuanuu i le faaiuga lava o le vaiaso, na fano ai foi le soifua o se tamā 37 tausaga, ae manun’ua ai nisi sa malaga ai i le taavale.

Sa faanatinati atu fo’i lea tama i le falema’i tele i Motootua, ae e le’i mafai ona faasaoina lona soifua.
Saunoa Auapaau ua molia e leoleo se tamā 53 tausaga i le ave taavale matautia ua mafua ai le maliu, ma le moliaga o le ave taavale faatamala ua mafua ai le manunu’a o nisi.
O loo taofia uma i laua sa faafoeina taavale nei, i lalo o le vaavaiga a leoleo, e tālia ai le Aso 6 Oketopa e tulai ai i luma o le Faamasinoga.
O le tulai mai o nei faalavelave ua momoli mai ai se feau taulogologo a le Matagaluega, e agai ia i latou o loo faafoeina sā i luga o le auala.
“Ia tautuana le saogalemu o lau pasese ae maise o le mamalu o le atunuu o loo feoai i luga o alatele, ma ia tausisia le saoasaoa faatapulaa ua faatulagaina, atoa ai ma tulafono o alatele vavave.”

Whose Hiring?


- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025














