Aveesea le Tofi Taitaifono o le Fono Faavae mai le Sui Faipule o le Itumalo Faasaleleaga 5

"O le mau a le Fono Faavae, e finagalo lava le Sui Faipule e faatino lona manao e aunoa ma se manatu i se tulaga ua autasi iai le Fono Faavae."

0
3580

Ua faamaonia mai e le Minisita o Tina ma Tamaitai, Nuu ma Agafesootai le afioga ia Mulipola Anarosa Molioo, le aveesea ai lea o le Sui Faipule o Faasaleleaga 5, le afioga ia Peseta Vaifou Tevaga, mai le tofi Taitaifono o le Komiti o le Fono Faavae a le Itumalo.

Saunoa Mulipola, sa oo atu le sāvali a le Itumalo i lona ofisa ma faaoo atu se tusi e faailoa atu ai se faaiuga ua autasi iai le Komiti, ina ia aveesea le faipule.

O ina sa faatino ai loa se asiasiga a le Komiti Autu o le Poloketi, lea e Taitaifono ai le Minisita.

Saunoa Mulipola, o mafuaga na tuuina mai i le finagalo autasi a le Fono Faavae, e aofia ai; le faaaoga sese lea o se seleni sa faamatuu atu e tanu ai le sami, ae peitai, o taiala mo le Poloketi, e le o iai lea galuega i taiala.

O le isi mafuaaga, o le fanua o loo finagalo ai le faipule e fausia ai le maota o le fono faavae, o loo iai le apili ma e le o to’a se tulaga lelei i le mataupu o lena fanua.

Ua finagalo fo’i le Fono Faavae, o loo to’alia le Poloketi e mafua mai i le faipule. O le mau a le Fono Faavae, e finagalo lava le Sui Faipule e faatino lona manao e aunoa ma se manatu i se tulaga ua autasi iai le Fono Faavae.

Ua fesiligia foi e le Fono Faavae nisi o vaega o le lipoti a le suetusi ae maise o le lē o gatasi o le faaaogaina o tupe, ma taiala na faatuina.

Tā’ua e le Minisita, “O mafuaga ia ua manatu ai le Komiti Faafoe e ao ona silasila i le manuia o tagata lautele o le Itumalo ae faia loa se faaiuga e faasee tuagalu ai le faipule mai le Komiti o le Fono Faavae a le Itumalo o Faasaleleaga 5, ona o loo toalia ai le poloketi.

O Faasaleleaga 5 o le isi itumalo e faatoa faamatuu i le masina o Ianuari o le tausaga nei le vaega mulimuli o le Poloketi Miliona muamua, ona o le tele o vaega sa to’alia ai le faamoemoe a le itumalo.

O le afioga i le Sui Faipule ia Peseta Vaifou Tevaga, o le tasi lea o sui matua o le Palemene aemaise le vaega faaupufai o le HRPP.