Tuuaia e Leauvaa le Lē Usitaia e Maulolo ma Ututaaloga o Poloaiga a le Faamasinoga Maualuga

0
364

O le vaiaso nei na suesue ai i luma o le Faamasinoga Maualuga le mataupu o loo tuuaia ai le afioga i le Faipule o Sagaga 2 le susuga ia Maulolo Tavita Amosa ma se tasi o tamalii o le afioaga o Afega ia Ututaaloga Charlie Ulia.

O loo tu’ua’ia e Leauvaa le lē usitaia e Maulolo ma Ututaaloga o se poloaiga le tumau (interim order) lea sa tuuina mai e le Faamasino Sili ia Aperila 2024, e taofia le tumau ai le galuega a Afega ae se’i iloilo le tagi a Leauvaa.

Sa finau malosi le tamaitai loia o loo tula’i mo le afioaga o Leauvaa iā Sala Josephine Stowers, e le’i tausisi e i laua nei le poloaiga le tumau sa tuuina mai e le Faamasino Sili e taofi ai le galuega a Afega.

Sala Josephine Stowers.

Sa tula’i se tasi o matai Leauvaa, le fetalaiga ia Tevaga Moutoa, e fai lana molimau i luma o le Faamasinoga.

Molimau Tevaga sa aga’i atu taulelea o Afega, ma tala i lalo lona tunoa, ma tuu i lalo nisi o laau.

Sa ia pueina se ata o gaioiga, ma lana mau, “o se faatonuga a Maulolo Tavita ma Ututaaloga Ulia..”

Sa finau fo’i Sala Josephine, na faia e Maulolo ni saunoaga e tuu maualalo ai le Faamasinoga faapea le Faamasino Sili.

Sa finau malosi atu fo’i le tamaitai loia o loo tula’i mo Afega, le afioga ia Mauga Precious Chang, o nei tuuaiga uma e le o mafai ona faamaoniaina i ni mau maumaututu ae na o tala feaveai (hearsay).

Finau fo’i Mauga, “e leai se vaega o le tulafono o le Faamasinoga o Fanua ma Suafa o loo solia e Afega”.

“O moliaga foi ua folasia e faasaga ia Maulolo Tavita, e tatau i le itu tagi ona aumai i luma o le faamasinoga ni mau maumaututu, e faamaonia ai tuuaiga nei e faasaga ia Maulolo Tavita Amosa.”

O le mataupu lenei o loo tulai mai ai i se finauga i fanua ua ma’ea ona faia iai le faaiuga a le Faamasinoga o Fanua ma Suafa, e tamau ai o fanua e pulea e Alii ma Faipule o Afega.

Sa mae’a suesuega ona malolo lea o le Faamasinoga e tālia se faaiuga a le Faamasino Sili ia Satiu Simativa Perese i se aso o i luma (reserve decision).