Feiloai Leoleo ma Afega e Faamautu le Filemu ma le Saogalemu i Nuu e Lua

0
1532

I se pepa o faamatalaga na tuuina mai i le vaiaso nei, sa tā’ua ai le fa’atinoina o se feiloaiga a le Matāgaluega o Leoleo Falepuipui ma le Toefuataiga, faatasi ma le Pulega a Alii ma Faipule o Afega i le Aso Gafua 15 Ianuari 2023.

“O le sāvali a le Matāgaluega i le afioaga o Afega auā le tausia pea o le fīlemū ma le afioaga o Le’auvaa, aemaise le fa’atumauina o le malu puipuia o tagatanu’u o afioaga uma e lua.”

O le afioga i le Taitai Leoleo Sinia (Superintendent) ia Tuaena Lomano Paulo o le vaega o Galuega Soosootauau ma le Atunuu (Community Engagement Unit) ma nisi o Taitai Leoleo Asiasi sa fai ma sui o le Matagaluega i lenei feiloaiga tāua.

O le afioga i le Faipule ia Maulolo Tavita Amosa sa fai ma sui o le afioaga o Afega, ma na ia faafetaia le Matāgaluega e tusa ai ma le sāvali.

Ma na fa’aalia e le afioga i le ali’i faipule le talia ai e le afioaga o Afega o le sāvali mo le tausiaina pea o le fīlēmū.

“O le naunauta’iga lava, ina ia saogalēmū ma malu puipuia tagata uma.”

Tā’ua i le Pepa o Faamatalaga, “E momoli le agaga fa’afetai a le Matagaluega o Leoleo, Falepuipui ma le Toefuata’iga i le Pulega a Alii ma Faipule o Afega mo lo latou lagolago i le galuega faatino a le Matāgaluega auā le tausia o le nofo fīlēmū i totonu o nu’u ma afioaga aemaise o totonu o si o tatou atunu’u o Samoa o loo fa’avae i le Atua.”

I le taimi nei e le’i tuuina mai e le Matagaluega o Leoleo, poo iai se isi o molia i ni manuaga ogaoga sa oo iai se tasi alii mai Leauvaa.

Maranata Simone i fafo mai o lona fale

O Maranata Simone, 27 tausaga mai Leauvaa sa fasi sese ina ua tulai mai ni vevesiga i le faatinoina o le galuega o loo kilia ai nei fanua o Afega o loo nofoia i Leauvaa-Uta.

Sa saunoa le tinā o Maranata, e lei faauluina se latou tagi i le Ofisa o Leoleo, ona sa iai alii malu o le Malo i le taimi na fasi ai lana tama ma tauai le latou fale.

“Ae ui i lea, ou te faamagalo iai, ma tuu atu i luma o Le Atua.”