Tusia: Taunuuga Toatasi, Gvt Press. O le tausaga lenei e atoa ai le 70 tausaga talu ona fa’avaeina le Sosaiete o Tausi Soifua Fa’amauina a Samoa.
I le Fonotaga Fa’aletausaga a le Sosaiete i lenei vaiaso, sa fa’amanatu fa’atasi ai ma le atoaga o lona 70 tausaga, e pei ona fa’atautaia i le Maota o Tupulaga EFKS i Sogi.
O le autū o lea aso, “O ā tatou Tausi Soifua, o lo tatou lumana’i; o le tausia lelei o Tausi Soifua e fa’amalosia ai le tamāo’āiga.”
O se aso na manatua ai i latou uma na asaina le gasū o le taeao ma mua i malae, i le fa’atinoga o lea auaunaga mo Samoa.
I le saunoaga autū a le Afioga i le Palemia iā Fiame Naomi Mataafa, sa ia toe fa’amanatu ai le tāua tele o lea auaunaga i totonu o le atunu’u.
“Ua tatou fesilafa’i i lenei fa’amoemoe ma le agaga ua tumu i le loto fa’afetai ona o le alofa tunoa o le Atua na ta’ita’ia le faigāmalaga.
“Ua tupu ma ola le galuega fa’a-Tausi Soifua Fa’amauina o Samoa, ua la’ala’a i luma le poto ma le tomai, ua si’itia tulaga o avanoa mo a’oa’oga i lenei matātā i ona tulaga tauāloa e pei ona i ai le polokalame i le Iunivesite Aoao o Samoa.
“Ua fa’aauau fo’i ona i ai tulaga o fa’avasegaina o avanoa faigaluega, totogi ma fa’amanuiaga e amanaia ai le tāua ma le loloto o lea auaunaga.
“E atagia i lenei autū le sao tāua o le Sosaiete a Tausi Soifua i le lumana’i manuia o tagata lautele o le atunu’u e pei ona i ai Ta’iala Autū a le Mālō i le Fa’aleleia o le Soifua Mālōlōina mo le Lautele.
“O fa’ailoga o se atunu’u manuia ma se atunu’u ua si’isi’i lona tamāo’āiga e atagia i le soifua mālōlōina o ona tagatānu’u.
O le Sosaiete e pei ona saunoa le Afioga i le Palemia, o se itutino malosi e fai sao i le anavatau a le Mālō i le soifua mālōlōina. O se pa’aga mautū ma ta’ua i le fa’atinoga o le auaunaga i se tulaga e pito sili ona maoa’e.
“O se itutino fo’i e finau lava mo mea sili e le gata mo le Sosaiete a Tausi Soifua i ana Faiga Fa’avae ma fa’amanuiaga, ae fa’apea fo’i mo le tulaga e si’itia ai lana auaunaga i le fa’atinoga o le galuega, ia o’oo’o lava i so’o se vaega o le atunu’u.
“I lenei Sosaiete, e lē tau tolaulauina atu tulaga o le tou soifua galulue, e molimau le atunu’u i lo outou gāpātia i le ao ma le po, le tautua ua au i so’o se tafa o Samoa. E ui ina i ai taimi na lofitūina ai Samoa ma le lalolagi i fa’ama’i pepesi, e le’i avea lea ma tulaga e vaivai pe mou ai le loto tautua i Tausi Soifua.
“Mālō le fai o le faiva.
“Afai e i ai se feau ua a’oa’o mai e le 70 tausaga o le Fono Fa’ale-Tausaga a le Sosaiete, o le feau ia tumau i le ta’utinoga ma le loto fa’afouina, e gafatia mea uma i le fa’atuatua.”
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
