6.5 Tausaga i le Toese mo lē sā Aveesea Faagaoi lata i le $1.5 Miliona Tala mai le ANZ

0
4081

E ono ma le afa tausaga le faasalaga i le toese a le tamaitai sa avea ma pule o vaega e faatino ai nonogatupe a le ANZ ina ua ia ioeina moliaga o le gaoi ao avea ma tagata faigaluega.

O le Aso Faraile na faatoa tuuina mai ai e le Faamasino Maualuga le faasalaga mo Seira Malifa, o se tamaitai mai le afioaga o Falelauniu ma Nuu Fou, lea sa ia ioeina moliaga e 323 sa ave faagaoi ai se tinoitupe e lata i le $!1.5 miliona tala.

Samoa is the Home of Taula.

I le fofogaina o le faaiuga a le alii Faamasino Sinia, le afioga iā Vui Clarence Nelson, na ia saunoa ai, o le solitulafono pito maualuga lava lea ua tuuina atu i luma o le Faamasinoga Maualuga a Samoa.

“E mataupu lava nei o le gaoi poo le lima tago ese, e pito sili lava ona matautia lea pe a fua i faamatalaga ma faamaumauga o le seleni na to’esea..”

Sa tuuina mai e le Faamasino Sinia se fautuaga mo le Ofisa o le Samoa Law Reform Commission, e tatau ona toe tagai i le tulafono ma faasalaga o loo iai mo soligatulafono faapenei. Ma toe tuutuu i luga le faasalaga o loo saisaitia ai le Faamasinoga Maualuga e tuuina mai.

Na saunoa le Faamasino Sinia i lē ua molia, “E ai nisi o itu lelei sa tulimata’i iai le vaai a le Faamasinoga sa tatau lava ona e faatinoina pei o le faia lea o sau faatoesega, ma lou taumafai lea e togitogi se vaega o le seleni, peitai, i le vaai a le Faamasinoga e le’i mafai ona e faatinoina ia tulaga.”

O le tausaga 2018 na amata ai ona faatino nei faiga faasolitulafono, seia oo mai ina ua maua i le 2022.

I le faatoa tulai o Seira Malifa i luma o le Faamasinoga ia Ianuari 2023, e na o le $80,000 le tinoitupe sa tuuaia ai o ia. Ae peitai, o Mati 2023 sa fofogaina ai e le itu a leoleo, o loo iai nisi moliaga faaopopo. ma oo atu ai lava suesuega ina ua lata i le $1.5 miliona tala.

O ni nonogatupe faafoliga (fake loans) sa faatinoina e Malifa, ma ia toe talaina i tua. O le auala lea sa toe’sea ai lenei seleni mai totonu o le faletupe.

I le tuuina mai o se faamatalaga tusia a le faletupe ua aafia (ANZ Victim Impact Report) sa tā’ua ai e le Alii Pule o Malifa o se tagata taufaasese (manipulative). O ia foi o se isi e faamaualuga ma faasoesa (bully) i totonu o le fale faigaluega. Ma e leai lava se taimi na faapea ai ua faaali le salamo i faatinoga sa fai.

Sa molimauina le auai atu lea o le loia a le faletupe, le afioga ia Taulapapa Liomatua Brenda Heather-Latu faapea le Pule Sili o le ANZ.

Please note change of time from 11am to 12:30pm

Na faatumulia foi le potu faamasino i uo ma aiga a le tamaitai o Seira Malifa.

E 9 tausaga na amata mai ai le fua a le Faamasinoga (starting point). Ona toesea lea o tausaga e pei ona masani ai, ona o nisi o itu lelei sa faatinoina e Malifa.

Sa fai ma itu lelei le vave ona ia ioeina moliaga. O le faatoa molia foi lea o ia i se solitulafono i luma o le Faamasinoga, ma le toe fesoasoani lea i le faatinoga o suesuega poo galuega faatino a le  Matagaluega o Leoleo.

Sa totoe mai ai le ono ma le afa tausaga. O le alii loia iā Afoa Fetu Lagaaia na tula’i mo Malifa.