O le afiafi ananafi 11 Me 2022 sa molimauina ai e le atunuu le taunuuga o le filifiliga sa gafa ma le Komiti o Tapenaga mo le faailogaina o le 60 tausaga o le tutoatasi a Samoa. O se faailoga (logo) ma se sini autu e faasino iai le faamanatuina o le 60 tausaga o le tutoatasi o Samoa, lea sa faalauiloa aloaia e le afioga i le Palemia Fiame Naomi Mataafa le manumalo ai o se kamupanī mai Niusila, o loo iai so latou lālā i Samoa nei, o le Bluwave. Sa tauaaoina ai e se sui o le kamupani i Samoa nei se siaki $5,000 tala mo lenei faamanuiaga.
I se saunoaga faapitoa a le afioga i le Palemia sa ia taua ai o se finagalo o le Kapeneta e tauala mai i le Komiti o Tapenaga o le 60 Tausaga o le Tutoatasi, ina ia iloilo ma fili se Faailoga ma se Sini Autu, e taula i ai le faamanatuina o le 60 tausaga o lo tatou malo tutoatasi.
“O le faamoemoe maualuga o lenei fuafuaga, ina ia tāpā le filigā mafua lelei a le atunuu, e faisao ai i le auau o le tapenaga, aemaise le toe tepa i tua i lenei savaliga umi, ma le agai atu i le lumanai.”
“O le mau a le atunuu, e tele aso ae lē lau aso, e lasi foi taeao, ae lē lau taeao. O lo tatou aulia manuia o lo tatou 60 tausaga, o se matatia iloga lea o lo tatou tala faasolopito. E le gata i le tatou savaliga mai le tele o lu’itau sa muai asaina e o tatou tuaā, na mua i malae e momoli le tatou mau mo lo tatou tutoatasi, ae faapea foi i le faasolosolo mai o le atiaeina o le Malo ma le atunuu, i le va feagai ai ma isi Malo o le Pasefika ma le lalolagi atoa.”
“O le ala lea sa faasalalau faalauaitele ai i le tulaga faatauvā le avanoa mo soo se tagata Samoa o loo alala i Samoa nei ma soo se itu o le lalolagi, e tuuina mai lo latou sao.”
Saunoa Fiame e toa 59 le aofai o talosaga sa tuuina atu ina ua tapunia le tauvaga, ona galulue ai lea o le Komiti e iloilo talosaga, e tusa ma alafua sa faataoto e togi i ai lenei tauvaga. Sa faatulaga ai foi ma faamaonia e le Kapeneta le faailoga tupe e SAT$5,000 e tuuina i le talosaga o le a manumalo.
O le aotelega o le faamatalaina o le Faailoga ua filifilia, ua faatulagaina e faapea;
1. O loo atagia ai le Savaliga a Samoa, i le afuafua mai o le sailiga o lona Malo Tutoatasi, e pei o le Mau a Tumua ma Pule. O le uiga lea o le mua tosi tasi paepae o loo i le fuainumera ‘60’.
2. O lanu ua faaaogaina, o loo atagia ai lanu o lo tatou Tagavai – lanu mumu, pa’epa’e ma le lanu moana.
3. O lo o atagia mai foi i le Faailoga lo tatou faatuatuaga faakerisiano i le maliu ma le toetu o lo tatou Faaola o Iesu Keriso, e pei ona faasinoina e fetu e lima,
4. O loo momoli mai e mamanu le vaaiga e foliga o ni tamatama’i lima, o le ata manino lea o le fusia o tagata uma i le loto e tasi, ae lautua i le alofa, feoeoea’i ma le fetausia’i, o loo folau ai pea Samoa i le filemu e oo mai i le asō.
Saunoa Fiame o vala autu ia o loo mamanuina ai le Faailoga ma taunuu ai i le filifiliga o le Sini Autu mo le faamanatuina o le 60 tausaga o lo tatou Malo Tutoatasi e fa’apea, “Folau ma le Faatuatua”.
“O le folauga a Samoa mai nei atuvasa e tele sa o tatou asaina talu mai le 1962, e i ai le talitonuga, ana tatou le folau ma le faatuatua i le Atua, ma lalafo uma o tatou faamoemoega ia te Ia, e faatonu folau mai, tatou te lē aulia lo tatou 60 tausaga.”
“O la tatou folauga foi e faaauau i le lumanai, tatou taofi faatasi, ua na’o le Atua tatou te faatuatuaina, na te taitaia Samoa ma lona Malo i le manuia ma le saogalemu.”
“E avea foi lenei laolao e momoli atu ai le faafetai tele i a i latou uma na resitala ma tuuina mai a latou tapenaga mo le tauvaga. E tele le oa ma le sosia o mafaufauga ma faaupuga sa matauina e le Komiti, na atagia mai i nei tapenaga. O le faitau a le atunuu i faigāmea i le tai, ‘e lē mua uma ni va’a’, ae lē itiiti le faafetai i lo outou sao tāua, e ala i lenei faamoemoe sa taumafai i ai le Komiti.”
[starbox]
