I le toe 6 ai o vaiaso ona tuuvae lea o le atunuu i lana faiga filifiliga i le palota tele, aemaise ua ma’ea le piriota e resitala ai sui tauva mo vaega faaupufai, ae peitai, o lea ua iai nisi o suiga e pei o le Minisita Tausi o le Matagaluega o Fesootaiga ma Faamatalaga Faatekonolosi.
O le afioga ia Mauu Siaosi Puepuemai, sa auai i le aso na faalauiloa ai (launch) le vaega faaupufai a le Samoa Ua Potopoto (SUP), ae peitai, ina ua mae’a ona resitala sui tauva, ua tula’i mai o loo tamo’e o se Sui Tutoatasi.
O le afioga ia Muau’u Siaosi e le tau faailoina, o se fai pisinisi lauiloa i totonu o Samoa i le fale pizza Georgie Pizza, o taavale rent, ma le fefaatauaiga o le ava Samoa.
Ua 3 Vaega Faaupufai a Mauu i le 3 Tausaga
O le 2021 sa mua’i tu mai ai le afioga ia Mauu e fai ma sui o le Itumalo o Vaa-o-Fonoti i upu fai a le atunuu, ina ua manumalo i le palota i lalo o le fu’a a le vaega faaupufai o le HRPP.
Peitai, e tasi le tausaga o le paeaiga i le faaiuga o le 2022, ae tuua loa ma ō ese mai Mau’u Siaosi, Vena Ale ma Tuuu Anasii mai le HRPP.
Ina ua faatino palota laiti (by-elections) ia Setema o le 2023, sa tamo’e ai Mau’u Siaosi o se sui o le vaega faaupufai o le Faatuatua i Le Atua Samoa ua Tasi.
Sa faamanuiaina Mau’u ma toe tula’i mai ai i le tofi o le itumalo, i lalo o le fu’a a le FAST.
Ina ua mavaevae le FAST ma tula’i mai faafitauli, sa tofia ai Mau’u e fai ma Minisita i lalo o le taitaiga a le Sa’o Faapito ia Fiame Naomi Mataafa. Sa ia lotolotoi ma auai ai i tapenaga uma a lea vaega faaupufai e pei ona matauina e le atunuu.
Faatoa taunuu mai fo’i le Minisita Tausi mai se malaga a le Malo sa agai iai ma lona faletua.
Peitai, o lea ua faailoa lona tuumuli ese mai le SUP, ae tauva mai o se Sui Tutoatasi.
Sa ave le fesili i le afioga i le faipule mo ni mafuaaga ua tolu ai ana vaega faaupufai, i totonu o le fa tausaga, i le paeaiga muamua lenei talu ona tulai mai i le tofi faipule.
E lei mafai ona faailoa mai e Mau’u le mafuaaga o lona tuumuli ese e avea ma Sui Tutoatasi. Ae o se molimau faatuatuaina o se matai o le itumalo, na ia ta’ua o le faaiuga a Mauu sa faavae i luga o se fautuaga a le itumalo e faase’e ese, ae tauva o se Sui Tutoatasi.
I le tapunia ai o le resitala mo sui tauva, ua manino mai ai le leai o se sui o le Samoa Ua Potopoto mo le itumalo o Vaa-o-Fonoti.
E faapena foi le itumalo o Alataua-i-Sisifo, lea ua faamavae ai le afioga ia Seuula Ioane, sa ia uumia le tofiga o le Minisita o Aoga.
E tapunia le piriota mo le resitalaina o sui tauva, ua faatuina se matatia fou i le 191 o sui tauva mo le faigapalota tele o le Aso 29 Aukuso 2025.
Mai le 191 ua resitalaina, e toa 26 sui tauva tamaitai poo le 13.6% o le aofai.
Ua iai fo’i i lenei faigapalota a tatou sui tauva faafafine e toalua e pei ona faasalau ma faamaonia mai e le Asosi o Faafafine i Samoa.
O le pati e pito sili ona toatele a latou sui tauva ua resitalaina, o le Faatuatua i Le Atua Samoa ua Tasi lea e 61 a latou sui tauva.
O le vaega faaupufai e Puipuia Aia Tatau o Tagata le HRPP e 52 a latou sui tauva.
O le Samoa United Party e 26 sui tauva ua resitalaina.
O Sui Tutoatasi poo Independents, lea e matauina e 44 le aofai o i latou.
O le Samoa Labour Party e 6 sui tauva, ae lua vaega faaupufai e na o le taitasi a latou sui tauva ua resitala mo le faigapalota: o le Samoa Democratic Republican Party ma le Tumua ma Pule e tai tasi a latou sui tauva.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
