25 Gasegase o le Koviti ua Faamauina e le Matagaluega o Soifua Maloloina

0
217
Tui Puipuia mo le Koviti - 19

I le fitu aso ua tuanai, e 25 gasegase o le koviti-19 na faamauina ai.

O se lipoti lata mai lea mai le Ofisa Sili o le Matagaluega o Soifua Maloloina, le Afioga ia Aiono Dr Alec Ekeroma.

Saunoa Aiono, “e ono toe fa’aauau galuega faatino i tatou nofoaga e pei o le malae vaalele o loo ulufale mai ai tagata i totonu o le tatou atunuu.”

O le toalima mai lea fuainumera e 25, o tagata sa malaga mai atunuu mamao ae o loo asiasi mai i a latou aiga i Samoa nei.

I faamaumauga mai le Matagaluega, ua oo atu i le 16,811 le aofai o tagata Samoa ua aafia talu ona oo mai le koviti-19 i Samoa nei.

O loo faamauina pea e 31 le aofai o le mamalu o le atunuu na fano soifua i le faama’i le koviti-19.

I le toe alia’e mai o le koviti, ua toe faamamafa mai ai e le Matagaluega o Soifua  Maloloina le faatino lea o auala o puipuiga, e ala i le faia o tui puipui faapea le faia o tali fofoga mo le saogalemu.

Ua faamalosia foi le faatinoina o siaki (covid testing) mo le mamalu o le atunuu o loo fia asiasi atu i le falema’i autu mo soo se tasi e afea le auaunaga faa-soifua maloloina.